രൂപതാമെത്രാനെ അദ്ദേഹത്തിന്റെ ഭരണനിർവഹണചുമതലയിലും അജപാലന ധർമ്മത്തിലും സഹായിക്കുന്നതിനുളള സംവിധാനമാണ് ‘രൂപതാ കൂരിയാ'(eparchial curia) അഥവാ ‘രൂപതാ കച്ചേരി’. നിയമനിർമാണധികാരം (legislative power) രൂപതാമെത്രാൻ വ്യക്തിപരമായി വിനിയോഗിക്കുന്നുവെങ്കിലും ഭരണനിർവഹണ അധികാരവും (executive power) നീതിനിർവഹണ അധികാരവും (judicial power) അദ്ദേഹം നേരിട്ടോ അല്ലെങ്കിൽ മറ്റുള്ളവരിലൂടെ വിനിയോഗിക്കാമെന്ന് പൗരസ്ത്യകാനൻ നിയമത്തിൽ c. 191 §2 വിശദീകരിക്കുന്നു. രൂപതാ കച്ചേരിയെക്കുറിച്ചും അവയിലെ അംഗങ്ങളെക്കുറിച്ചും അവരുടെ നിയമനങ്ങൾ, പ്രവർത്തനങ്ങൾ എന്നിവയെക്കുറിച്ചും CCEO c. 243 മുതൽ 262 വരെയുള്ള കാനോനകൾ വ്യക്തമാക്കുന്നു. രൂപതാമെത്രാനു തനിക്ക് ഏല്പിക്കപ്പെട്ടിരിക്കുന്ന രൂപതയിൽ നിർബന്ധമായും ഒരു രൂപതാ കൂരിയ സ്ഥാപിക്കേണ്ടതാണ് (CCEO 242 §1). രൂപതാ കൂരിയായിൽ താഴെപ്പറയുന്നവരാണ് അംഗങ്ങളായിരിക്കുന്നത്. പ്രോട്ടോ സിൻഞ്ചെല്ലൂസ്, സിഞ്ചെല്ലുസുമാർ, ജുഡീഷ്യൽ വികാർ, രൂപതാ ഫിനാൻസ് ഓഫീസർ, ഫിനാൻസ് കൗസിൽ, ചാൻസലർ, രൂപത ജഡ്ജിമാർ, പ്രൊമോട്ടർ ജസ്റ്റിസ്, ഡിഫെൻഡർ ഒാഫ് ബോണ്ട്, നോട്ടറിമാർ, രൂപതാ കച്ചേരിയുടെ ചുമതലകൾ വേണ്ടവിധം നിർവഹിക്കുന്നതിന് രൂപതാമെത്രാൻ നിശ്ചയിച്ചിരിക്കുന്ന മറ്റു വ്യക്തികളും രൂപതാകച്ചേരിയിൽ അംഗങ്ങളായിരിക്കും (CCEO 242 §2). വിശാലമായ അർഥത്തിൽ മേല്പറഞ്ഞവരെല്ലാം രൂപതാകൂരിയായുടെ ഭാഗമാണെങ്കിലും ദിനംപ്രതിയുള്ള രൂപതാഭരണത്തിൽ രൂപതാമെത്രാനെ സഹായിക്കുന്നവർ പ്രോട്ടോ സിൻഞ്ചെല്ലൂസ്സും സിൻഞ്ചെല്ലൂസുമാരും ചാൻസലറും ഫിനാൻസ് ഓഫീസറുമാണ്.
രൂപതാകൂരിയായിൽ എത്തുന്ന അപേക്ഷകളും പരാതികളും മറ്റു പ്രധാനപ്പെട്ടവിഷയങ്ങളും പരിഗണിക്കുന്നതും അവയെപ്പറ്റിയുള്ള കൂടിയാലോചനയ്ക്കുശേഷം ബന്ധപ്പെട്ടവരെ അറിയിക്കുന്നതും കൂരിയായുടെ പ്രവർത്തനങ്ങളിൽ വരുന്നതാണ്. ഇതിനായി മേല്പറഞ്ഞവർ ആഴ്ചയിലെ നിശ്ചയിക്കപ്പെട്ട ദിവസങ്ങളിൽ രൂപതാ മെത്രാനൊപ്പം ഒരുമിച്ചുകൂടി രൂപതയുടെ ദൈനംദിന പ്രവർത്തനങ്ങൾക്കുള്ള മാർഗനിർദേശങ്ങളും തീരുമാനങ്ങളും എടുക്കാൻ രൂപതാമെത്രാനെ സഹായിക്കുന്നവരാണ്.
രൂപതാ കൂരിയായിൽ ഔദ്യോഗിക തസ്തിക വഹിക്കുന്നവരെ ആ തസ്തികയിൽ നിയമിക്കുന്നതിനും നീക്കം ചെയ്യുന്നതിനുമുള്ള അധികാരം രൂപതാമെത്രാനുള്ളതാണ്. രൂപതാമെത്രാനു സ്വതന്ത്രമായി യോഗ്യതയുള്ളവരെ കൂരിയായിൽ നിയമിക്കാൻ അവകാശമുണ്ട്. രൂപതയിൽ സഹായമെത്രാൻ ഉണ്ടെങ്കിൽ അദ്ദേഹത്തെയാണ് പ്രോട്ടോസിൻഞ്ചെല്ലൂസായി നിയമിക്കേണ്ടത് (C. 215 §1). ചില നിയമനങ്ങൾ നടത്താൻ മെത്രാൻ ഔദ്യോഗിക സമിതികളോട് ആലോചിക്കേണ്ടതാണെന്നും പൊതുനിയമം നിഷ്കർഷിക്കുന്നു. ഉദാഹരണമായി രൂപതയുടെ ഫിനാൻസ് ഓഫീസറെ നിയമിക്കാൻ രൂപതാ ആലോചനാ സംഘത്തോടും ഫിനാൻസ് കൗൺസിലിനോടും മെത്രാൻ ആലോചന നടത്തേണ്ടതുണ്ട് (CCEO c. 262 §1). മറ്റു നിയമനങ്ങൾ നടത്താൻ മെത്രാന് ആരോടും ആലോചിക്കേണ്ടതില്ല. രൂപതയുടെ കൂരിയായിൽ നിയമിക്കപ്പെടുന്ന കൂരിയാ അംഗങ്ങൾ ജോലിയിൽ പ്രവേശിക്കുമ്പോൾ തങ്ങളെ നിയമംവഴിയോ മെത്രാനോ ഏല്പിച്ചിരിക്കുന്ന ചുമതലകൾ വിശ്വസ്തതാപൂർവം നിർവഹിക്കുമെന്നും ജോലിയുടെ സ്വഭാവത്തിനനുസരിച്ചുള്ള രഹസ്യങ്ങൾ കാത്തു സൂക്ഷിക്കുമെന്നും മെത്രാനുമുമ്പിൽ പ്രതിജ്ഞ (oath) എടുക്കേണ്ടതാണ് (CCEO c 244 §2).
രൂപതാഭരണത്തിൽ രൂപതാമെത്രാനെ സഹായിക്കുന്ന കൂരിയ അംഗങ്ങൾക്ക് വികാരിയസ് അധികാരമാണുള്ളത്. രൂപതാ മെത്രാന്റെ പേരിൽ തങ്ങളെ ഏല്പിച്ചിരിക്കുന്ന കർത്തവ്യങ്ങൾ വിശ്വസ്തതാപൂർവം നിർവഹിക്കുവാനും രൂപതയുടെ വളർച്ചയ്ക്കും നന്മയ്ക്കുമായി പ്രവർത്തിക്കാനും കൂരിയാഅംഗങ്ങൾക്ക് കടമയും ഉത്തരവാദിത്വവുമുണ്ട്.
റവ. ഡോ. ജോസഫ് മറ്റത്തിൽ
