പൗരസ്ത്യസഭകളുടെ അതിപുരാതനമായ പാരമ്പര്യത്തില്‍ വിവാഹത്തിനുമുമ്പുള്ള വിവാഹവാഗ്ദാനം അതാതു സ്വയാധികാരസഭയുടെ പാരമ്പര്യങ്ങളിലും ആചാരാനുഷ്ഠാനങ്ങളിലും അധിഷ്ഠിതമാണ് (can. 782 §1, CCEO). അതിനാല്‍ ഓരോ സഭയുടെയും പ്രത്യേകനിയമം ഇക്കാര്യം നിയന്ത്രിക്കുന്നു. മാര്‍ത്തോമ്മാക്രിസ്ത്യാനികളുടെ ഇടയില്‍ ഇത് ‘പറഞ്ഞൊക്കല്‍’ ‘മനസ്സമ്മതം’, ‘ഒത്തുകല്ല്യാണം’, ‘കൂടിക്കാഴ്ച’ എന്നീ പേരുകളിലാണ് അറിയപ്പെട്ടിരുന്നത്. വധൂവരന്മാരുടെ മാതാപിതാക്കന്മാരും ബന്ധുമിത്രാദികളുമാണ് പ്രധാനമായും ഈ കര്‍മ്മത്തില്‍ പങ്കാളികളാകുന്നത്. വിവാഹവാഗ്ദാനം നടന്നുവെന്നതിന്റെ പേരില്‍ വിവാഹം നിര്‍ബന്ധമായും നടത്തണമെന്ന് നിയമം അനുശാസിക്കുന്നില്ല. എന്നാല്‍ എന്നാല്‍ അതിന്റെ ഫലമായി ഉണ്ടായിട്ടുള്ള നഷ്ടത്തിന് മറുകക്ഷി പരിഹാരം കൊടുക്കേണ്ടതാണ് (can. 782 §2, CCEO).

സീറോ മലബാര്‍ സഭയുടെ പ്രത്യേക നിയമം art. 154 മുതല്‍ 162 വരെയുള്ള ഭാഗത്താണ് മനസ്സമ്മതത്തെപ്പറ്റി പ്രതിപാദിക്കുന്നത്. വാഹത്തിനുമുമ്പ് മനസ്സമ്മതം നടത്തേണ്ടതാണ്. വിവാഹ പരസ്യത്തിന് (publication of banns) ആവശ്യമായ സമയം ലഭിക്കത്തക്ക വിധത്തില്‍ ആയിരിക്കണം ഇത് നടത്തേണ്ടത്. വധൂവരന്മാരില്‍ ആരുടെയെങ്കിലും സ്ഥലമേലദ്ധ്യക്ഷന്റെയോ ഇടവകവികാരിയുടെയോ മുമ്പിലോ അവരാല്‍ നിയോഗിക്കപ്പെടുന്ന ഒരു വൈദികന്റെയോ ഡീക്കന്റെയോ മുമ്പിലോ, രണ്ടു സാക്ഷികളുടെ സാന്നിധ്യത്തില്‍ ഇടവക ദേവാലയത്തില്‍ വച്ച് മനസ്സമ്മതം നടത്താവുന്നതാണ്. സാധാരണയായി ഈ വാഗ്ദാനം വധുവിന്റെ ഇടവകപള്ളിയില്‍വച്ചാണ് നടത്തുന്നത്. എന്നാല്‍ വധൂവരന്മാരുടെ സൗകര്യം അനുസരിച്ച് ഇടവക വികാരിയുടെ അനുവാദത്തോടെ മറ്റേതെങ്കിലും ദൈവാലയത്തില്‍ വച്ച് നടത്താവുന്നതാണ്. ദൈവാലയത്തില്‍ അല്ലാതെ മറ്റു സ്ഥലങ്ങളില്‍ വച്ച് നടത്തണമെങ്കില്‍ സ്ഥലമേലദ്ധ്യക്ഷന്റെ അനുവാദം ആവശ്യമാണ്.

മനസ്സമ്മത കുറിയോ (Form A) അതിനു സമാനമായ രേഖയോ ലഭിച്ചതിനുശേഷം മാത്രമേ മനസ്സമ്മതം നടത്താന്‍ പാടുള്ളൂ. മനസ്സമ്മതകര്‍മ്മം സീറോ മലബാര്‍ സഭയുടെ സിനഡ്  അംഗീകരിച്ച കര്‍മ്മക്രമം അനുസരിച്ച് നിര്‍വഹിക്കണം. വിവാഹനിശ്ചയം ഒരു കുദാശാനുകരണം മാത്രമായതുകൊണ്ട്, അത് വിശുദ്ധ കുര്‍ബാനയോടൊപ്പം നടത്താറില്ല. ഞായറാഴ്ചകളിലോ മറ്റ് കടപ്പെട്ട ദിവസങ്ങളിലോ ആണ് നടത്തുന്നതെങ്കില്‍, ഈ ചടങ്ങിന് മുമ്പോ ശേഷമോ വിശുദ്ധ കുര്‍ബാന അര്‍പ്പിക്കാവുന്നതാണ്. മനസ്സമ്മതം നടന്ന വിവരം അതിനുള്ള രജിസ്റ്ററില്‍ എഴുതി ചേര്‍ക്കുകയും അതില്‍ വധൂവരന്മാരും സാക്ഷികളും കാര്‍മ്മികനും  ഒപ്പുവയ്ക്കുകയും ചെയ്യണം. മനസമ്മതം നടത്തിയ ശേഷം വിവാഹപ്പരസ്യകുറി (Form B) മുഖാന്തരം വരന്റെ അല്ലെങ്കില്‍ വധുവിന്റെ ഇടവക വികാരിയെ അക്കാര്യം അറിയിക്കേണ്ടതാണ്. മിശ്രവിവാഹങ്ങള്‍ക്ക് മുമ്പ് മനസ്സമ്മതം അനുവദിക്കേണ്ടതുണ്ടോ എന്ന് അപേക്ഷയുടെ സ്വഭാവം മനസ്സിലാക്കി സ്ഥലമേലദ്ധ്യക്ഷനു തീരുമാനിക്കാവുന്നതാണ്. കാനോനികക്രമത്തില്‍ നിന്ന് നിയമപരമായി ഒഴിവ് ലഭിച്ചശേഷം നടത്തുന്ന മിശ്രവിവാഹങ്ങള്‍ക്ക് മനസ്സമ്മതം അനുവദിക്കാവുന്നതാണ്.

ന്യായമായ കാരണങ്ങള്‍ ഉണ്ടെങ്കില്‍ ഏതെങ്കിലും ഒരു കക്ഷിയുടെ സ്ഥലമേലദ്ധ്യക്ഷന് മനസമ്മതം നടത്തുന്നതില്‍ നിന്ന് ഒഴിവു നല്‍കാവുന്നതാണ്. അതിനുള്ള അപേക്ഷ ഇരുകക്ഷികളും തങ്ങളുടെ ഇടവക വികാരിമാരുടെ സാക്ഷിപ്പോടെ നല്‍കിയാല്‍ മതിയാകും. അത്യാവശ്യ സന്ദര്‍ഭങ്ങളില്‍ മനസ്സമ്മതം രേഖാമൂലവും നടത്താവുന്നതാണ്. വധുവും വരനും രണ്ട് സാക്ഷികളുടെ സാന്നിധ്യത്തില്‍ അവരവരുടെ ഇടവക വികാരിയുടെ മുമ്പാകെ നിശ്ചയിക്കപ്പെട്ട വിവാഹത്തിനുള്ള തങ്ങളുടെ സമ്മതം എഴുതി വെളിപ്പെടുത്തുന്നതിനെയാണ് രേഖാ മൂലം ഉള്ള മനസമ്മതം എന്ന് പറയുന്നത്.  ഇരുകൂട്ടരുടെയും സമ്മതം ഇടവക വികാരിമാര്‍ പരസ്പരം അറിയിക്കേണ്ടതാണ്. സ്ഥലമേലദ്ധ്യക്ഷന്മാര്‍ക്ക് മാത്രമേ ഇപ്രകാരമുള്ള മനസ്സമ്മതം അത്യാവശ്യം സന്ദര്‍ഭങ്ങളില്‍ അപേക്ഷയുടെ അടിസ്ഥാനത്തില്‍ അനുവദിക്കുവാന്‍ അവകാശമുള്ളൂ.  മനസ്സമ്മതത്തിനുശേഷം പ്രസ്തുത വിവാഹം നടത്തുവാന്‍ ഒരു കക്ഷി താത്പര്യപ്പെടുന്നില്ലെങ്കില്‍ ആ കക്ഷിക്ക് സ്ഥലമേലദ്ധ്യക്ഷനില്‍ നിന്ന് അനുവാദം വാങ്ങി മറ്റൊരു വ്യക്തിയുമായി വിവാഹം നടത്താവുന്നതാണ്.

റവ.ഡോ. ജോഷി കുളത്തുങ്കല്‍