ക്രൈസ്തവ ജീവിതത്തിന്റെ ഉറവിടവും മകുടവുമാണ് വിശുദ്ധ കുര്‍ബാന എന്ന് രണ്ടാം വത്തിക്കാന്‍ കൗണ്‍സില്‍ നമ്മെ പഠിപ്പിക്കുന്നു. അതിനാല്‍തന്നെ വിശുദ്ധ കുര്‍ബാനയുടെ ആഘോഷത്തോടും അതിന്റെ വിതരണത്തോടും ബന്ധപ്പെട്ട ശുശ്രൂഷകള്‍ സഭ വളരെ ഗൗരവത്തോടെയാണ് ക്രമീകരിച്ചിരിക്കുന്നത്. സാധാരണയായി വിശുദ്ധ കുര്‍ബാന വിതരണം ചെയ്യുന്നതിനുള്ള ശുശ്രൂഷ പൗരോഹിത്യക്രമത്തില്‍പ്പെട്ടവരുടേതാണ്. എന്നാല്‍ ചില പ്രത്യേകമായ അജപാലന സാഹചര്യങ്ങളില്‍ ആവശ്യകത കണക്കിലെടുത്ത് മറ്റ് വിശ്വാസികള്‍ക്കും ഈ ശുശ്രൂഷ നിര്‍വഹിക്കുവാന്‍ സഭ അനുവാദം നല്‍കുന്നു. ഇവരെയാണ് വിശുദ്ധ കുര്‍ബാന നല്‍കാനുള്ള അസാധാരണ ശുശ്രൂഷികള്‍ എന്നു വിളിക്കുന്നത്. 

ലത്തീന്‍സഭയുടെ നിയമം അനുസരിച്ച്, മെത്രാന്മാരും വൈദികരും ഡീക്കന്മാരും വിശുദ്ധ കുര്‍ബാനയുടെ സാധാരണ ശുശ്രൂഷകരാണ് (can. 910 §1, CIC). അതേസമയം വിശുദ്ധ കുര്‍ബാനയുടെ അസാധാരണ ശുശ്രൂഷികള്‍ ഒരു അക്കൊലൈറ്റോ (acolyte), നിയമം അനുസരിച്ച് നിയോഗിക്കപ്പെട്ട (can. 230 §3, CIC) മറ്റൊരു ക്രിസ്തീയ വിശ്വാസിയോ ആണ് (910 §2, CIC).

പൗരസ്ത്യ കത്തോലിക്കാസഭകള്‍ക്കായുള്ള നിയമം (CCEO) ഈ വിഷയത്തെ കുറച്ചുകൂടി വ്യത്യസ്തമായ രീതിയിലാണ് ക്രമീകരിക്കുന്നത്. CCEO കാനോന 709 §1 അനുസരിച്ച്, വിശുദ്ധ കുര്‍ബാന നല്‍കേണ്ടത് വൈദികര്‍ മാത്രമാണ്. ബന്ധപ്പെട്ട സ്വയാധികാര സഭയുടെ പ്രത്യേക നിയമം അങ്ങനെ വ്യവസ്ഥ ചെയ്യുന്നുവെങ്കില്‍ മാത്രം ഡീക്കനും വിശുദ്ധ കുര്‍ബാന വിതരണം ചെയ്യാം. സീറോമലബാര്‍സഭയുടെ പ്രത്യേക നിയമം അനുസരിച്ച് ഡീക്കന്മാരും വിശുദ്ധ കുര്‍ബാനയുടെ സാധാരണശുശ്രൂഷകരാണ്. മറ്റു വിശ്വാസികള്‍ക്ക് ഈ അധികാരം കൊടുക്കണമോ എന്ന് മെത്രാന്‍മാരുടെ സിനഡിന് തീരുമാനിക്കാവുന്നതാണ് (can. 709 §2, CCEO). ഇതിന്റെ അടിസ്ഥാനത്തില്‍ സീറോമലബാര്‍സഭയുടെ പ്രത്യേക നിയമം വിശുദ്ധ കുര്‍ബാന നല്‍കാനുള്ള അസാധാരണ ശുശ്രൂഷകരെക്കുറിച്ച് വ്യക്തമായ മാനദണ്ഡങ്ങള്‍ നല്‍കിയിട്ടുണ്ട്. സീറോമലബാര്‍ സഭയുടെ പ്രത്യേക നിയമം അനുസരിച്ച്, താഴെപ്പറയുന്ന വിഭാഗങ്ങളില്‍പ്പെട്ടവരെ വിശുദ്ധ കുര്‍ബാനയുടെ അസാധാരണ ശുശ്രൂഷകരായി നിയോഗിക്കാവുന്നതാണ്:

1. കുറഞ്ഞത് കാറോയാ പട്ടം (Karoyusa) സ്വീകരിച്ച മേജര്‍ സെമിനാരി വിദ്യാര്‍ഥികള്‍;
2. വൈദികര്‍ അല്ലാത്ത, സമര്‍പ്പിതജീവിത സമൂഹങ്ങളിലെ (nonclerical religious institute) നിത്യവ്രതം സ്വീകരിച്ച അംഗങ്ങള്‍;
3. നല്ല പെരുമാറ്റമുള്ളവരും (good standing), ഇടവക വികാരിക്കും ഇടവക വിശ്വാസികള്‍ക്കും പൊതുവേ സ്വീകാര്യരുമായ അല്മായ വിശ്വാസികള്‍.

ഒരു വ്യക്തി കത്തോലിക്കാ വിശ്വാസിയാണെന്ന ഒറ്റ കാരണത്താല്‍ ഈ ശുശ്രൂഷയ്ക്ക് സ്വയമേവ യോഗ്യനാകുന്നില്ല. വ്യക്തിയുടെ സഭാജീവിതം, ധാര്‍മിക നിലപാട്, പൊതുസാക്ഷ്യം, വിശ്വാസികളുടെ അംഗീകാരം എന്നിവയും പരിഗണിക്കേണ്ടതാണ്.

അസാധാരണ ശുശ്രൂഷകനായി നിയമിക്കപ്പെടുന്നത് വിശുദ്ധ കുര്‍ബാന വിതരണം ചെയ്യാനുള്ള സ്ഥിരമായ അവകാശമല്ല; പ്രത്യേകമായി ഏല്‍പ്പിക്കപ്പെട്ട ഒരു ശുശ്രൂഷയാണ്. വിശുദ്ധ കുര്‍ബാന നല്‍കുവാന്‍ ആവശ്യത്തിന് വൈദികരുള്ളപ്പോള്‍ അസാധാരണ ശുശ്രൂഷികളെ അതിനായി നിയോഗിക്കേണ്ടതില്ല. അതുപോലെതന്നെ വൈദികര്‍ക്ക് മാത്രമാണ് വിശുദ്ധ കുര്‍ബാന എടുത്ത് ഭക്ഷിക്കുവാന്‍ അനുവാദം ഉള്ളത്. വിശ്വാസികള്‍ക്ക് വിശുദ്ധ കുര്‍ബാന നേരിട്ട് എടുത്ത് ഭക്ഷിക്കുവാന്‍ അനുവാദമില്ല.
സമര്‍പ്പിതരെയും അല്മായരെയും അസാധാരണ ശുശ്രൂഷികളായി നിയമിക്കുന്ന ഉത്തരവാദിത്വം രൂപതാ മെത്രാനില്‍ നിക്ഷിപ്തമാണ്. ഇപ്രകാരം നിയോഗിക്കപ്പെടാവുന്നവരുടെ പേരുവിവരങ്ങള്‍ അവരുടെ ശുശ്രൂഷ ആവശ്യമുള്ള ഇടവകകളിലെ വികാരിമാരാണ് അനുമതിക്കായി രൂപതാ മെത്രാന് സമര്‍പ്പിക്കേണ്ടത്. ഇപ്രകാരം അനുമതി ലഭിച്ചു കഴിഞ്ഞാല്‍ ഇടവക വികാരിയുടെ നിര്‍ദ്ദേശത്തിന് അനുസരിച്ച് ആയിരിക്കണം അവരുടെ ശുശ്രൂഷ നിര്‍വഹിക്കേണ്ടത്. രൂപതാ മെത്രാന്‍ നിര്‍ദ്ദേശിച്ചിരിക്കുന്ന തിരുവസ്ത്രങ്ങള്‍ ധരിച്ചു കൊണ്ടാവണം ഇവര്‍ വിശുദ്ധ കുര്‍ബാന നല്‍കേണ്ടത്.

വിശുദ്ധ കുര്‍ബാന കൈകാര്യം ചെയ്യുക എന്നത് വളരെ ഗൗരവമുള്ള സഭാശുശ്രൂഷയാണ്. അതിനാല്‍ അസാധാരണ ശുശ്രൂഷകരുടെ തിരഞ്ഞെടുപ്പും പരിശീലനവും പ്രത്യേക ശ്രദ്ധയോടെ നടത്തണം. പരിശീലനത്തില്‍ വിശുദ്ധ കുര്‍ബാനയെക്കുറിച്ചുള്ള ശരിയായ വിശ്വാസബോധം, സഭയുടെ ആരാധനാക്രമത്തെക്കുറിച്ചുള്ള അടിസ്ഥാന അറിവ്, അസാധാരണ ശുശ്രൂഷയുടെ സ്വഭാവം, വിശുദ്ധ കുര്‍ബാന വിതരണം ചെയ്യുന്നതിനുള്ള ശരിയായ രീതി തുടങ്ങിയ വിഷയങ്ങള്‍ ഉള്‍പ്പെടുത്തുന്നത് ഉചിതമാണ്. ഇവിടെ ഓര്‍ക്കേണ്ടത്, അസാധാരണ ശുശ്രൂഷകന്‍ ഒരു ‘പ്രായോഗിക സഹായി’ മാത്രമല്ല എന്നതാണ്. വിശുദ്ധ കുര്‍ബാനയോടുള്ള സഭയുടെ വിശ്വാസവും ആദരവും തന്റെ ജീവിതത്തിലൂടെയും ശുശ്രൂഷയിലൂടെയും പ്രകടമാക്കുന്ന ഒരു സഭാശുശ്രൂഷകനാണ് അദ്ദേഹം/അവള്‍. സഭയുടെ അജപാലന ആവശ്യകതയില്‍, പരിശുദ്ധ കുര്‍ബാനയോടുള്ള പരമമായ ആദരവോടെ സാധാരണ ശുശ്രൂഷകരെ സഹായിക്കുക എന്നത് മാത്രം ആണ് അവരുടെ ശുശ്രൂഷയുടെ ലക്ഷ്യം. 

റവ. ഡോ. ജോഷി കുളത്തിങ്കൽ