തട്ടിൽ പിതാവിനെ വളരെ നേരത്തെ മുതൽ പരിചയമുണ്ട്. വശ്യമനോഹരമായ പെരുമാറ്റം, ലാളിത്യമാർന്ന ജീവിതം,കരുണാർദ്രമായ മനുഷ്യസ് നേഹം, ശിശുസഹജമായ നിഷ്ക്കളങ്കത ഇതെല്ലാം ഒത്തിണങ്ങിയ പിതാവെന്ന നിലയിൽ ഇടപെടുന്നവർക്കെല്ലാം വിട്ടുപിരിയാനാവാത്ത സൗഹൃദം തീർത്തുകൊണ്ടാണ് മാർ തട്ടിൽ എപ്പോഴും ഇടപെടുന്നത്.
ആത്മീയ ചൈതന്യത്തിന്റെ അത്യുംഗങ്ങളിലേക്ക് വിശ്വാസിസമൂഹത്തെ ആനയിക്കുന്നതുപോലെ ഭൗതികജീവിതത്തിന്റെ നാനാവിധ മേഖലകളിലും പ്രശ്നങ്ങളിലും സജീവമായി ഇടപെടാൻ കഴിയുന്ന ഉന്നതസ്ഥാനീയനായി മാറാൻ ഈ സ്ഥാനം വഴി കഴിയട്ടെയെന്ന് ആശംസിക്കുന്നു.
കാലവും ചരിത്രവും നല്കുന്ന ഉത്തരവാദിത്തം ഏറ്റെടുത്ത് നിർവഹിക്കാൻ കഴിയുന്ന കർമ്മശേഷിയും കരുത്തും അദ്ദേഹത്തിനുണ്ട്. എല്ലാ വിഭാഗം ആളുകളുടെയും സ്നേഹാദരവുകൾ പിടിച്ചുപറ്റി സങ്കീർണ്ണമായ ഏതു പ്രശ്നങ്ങളെയും സമചിത്തതയോടെ, സഹിഷ്ണുതയോടെ, സംയമനത്തോടെ പരിഹരിക്കാൻ കഴിയുന്ന അദ്ദേഹം ഒന്നാന്തരം ക്രൈസിസ് മാനേജർ കൂടിയാണ്. സഭയെയും സമൂഹത്തെയും വലിയ സംഭാവനകൾ നല്കി സേവിക്കാനും സ്നേഹിക്കാനും കഴിയുന്ന ആത്മീയചൈതന്യമായി അദ്ദേഹത്തിന്റെ ഭാവിപ്രവർത്തനങ്ങൾ മാറട്ടെയെന്ന് ആശംസിക്കുന്നു.
