എറണാകുളം-അങ്കമാലിയുടെ മേജർ ആർച്ചുബിഷപ്പും ഈ പ്രിയപ്പെട്ട സഭയുടെ പിതാവും തലവനുമായി സീറോമലബാർസഭയുടെ മെത്രാൻ സിനഡ് അങ്ങയെ തെരഞ്ഞെടുത്തത്, പൗരസ്ത്യസഭകൾക്കായുള്ള നിയമസംഹിതയിലെ 153 കാനോന രണ്ടാം ഖണ്ഡികപ്രകാരം സ്ഥിരീകരിക്കണമെന്ന് അഭ്യർത്ഥിച്ചുകൊണ്ടുള്ള അങ്ങയുടെ കത്ത് എനിക്ക് ലഭിച്ചു.
അങ്ങ് അഭ്യർഥിച്ച സ്ഥിരീകരണം ഞാൻ സ്വമനസാ നല്കുകയും നമ്മുടെ നാഥനും ദൈവവുമായ ഈശോമിശിഹായിൽ സഹോദരനിർവിശേഷമായ ആശംസകൾ അറിയിക്കുകയും ചെയ്യുന്നു. അങ്ങയുടെ ആദരണീയരായ മുൻഗാമികളുടെ മാതൃക പിഞ്ചെന്നു അങ്ങേയ്ക്കിപ്പോൾ ഏല്പ്പിക്കപ്പെട്ടിരിക്കുന്ന അജഗണങ്ങൾക്ക് ഉദാരവും ഫലപ്രദവുമായ അജപാലനശുശ്രൂഷചെയ്യാനുള്ള അങ്ങയുടെ പരിശ്രമങ്ങൾക്കു വേണ്ടി ഞാൻ പ്രാർഥിക്കുന്നു. അതുപോലെതന്നെ, പാവപ്പെട്ടവരെയും അത്യാവശ്യങ്ങളിലായിരിക്കുന്നവരെയും പ്രത്യേകമായി ഓർമിക്കണമെന്നു ഞാൻ അങ്ങയോട് ആഹ്വാനംചെയ്യുന്നു. അങ്ങയുടെ പിതൃസഹജമായ നേതൃത്വത്തിൽ സീറോമലബാർസഭ വളരുകയും അഭിവൃദ്ധിപ്പെടുകയും ചെയ്യുന്നതിന് ഈ സഭയുടെ ഐക്യവും വിശ്വസ്തതയും ദൗത്യവും പരിശുദ്ധാത്മാവു പരിപോഷിപ്പിക്കട്ടെ.
സീറോമലബാർസഭയുടെ സിനഡ് അംഗങ്ങളായ എന്റെ സഹോദരന്മാർക്കും വൈദികർക്കും സമർപ്പിതരായ സഹോദരിസഹോദരന്മാർക്കും വൈദികവിദ്യാർഥികൾക്കും സമർപ്പിതാർഥികൾക്കും അല്മായവിശ്വാസികൾക്കും എന്റെ ഹൃദയപൂർവകമായ ആശംസകൾ അറിയിക്കുന്നതോടൊപ്പം പരിശുദ്ധ ദൈവമാതാവിന്റെയും പരിശുദ്ധ പിതാമഹനായി മാർതോമാശ്ലീഹായുടെയും മാധ്യസ്ഥ്യം ഞാൻ പ്രാർഥിക്കുന്നു. നിങ്ങളെല്ലാവരോടുമുള്ള എന്റെ ആത്മീയമായ അടുപ്പം ഉറപ്പിച്ചുകൊണ്ടു ദയവായി എനിക്കുവേണ്ടി പ്രാർഥിക്കണമെന്ന് ആവശ്യപ്പെട്ടുകൊണ്ടു നിങ്ങൾക്കല്ലാവർക്കും ഞാൻ എന്റെ ആശീർവാദം നല്കുന്നു.
റോമിലെ സെന്റ് ജോൺ ലാറ്ററനിൽനിന്ന് 2024 ജനുവരി 9നു നല്കപ്പെട്ടത്.
ഫ്രാൻസിസ് മാർപാപ്പ
