*പാലക്കാട് കേന്ദ്രമായി ആരംഭിച്ച  പരിശുദ്ധ ത്രിത്വത്തിന്റെ ഡൊമിനിക്കന്‍  സന്യാസിനീ സമൂഹത്തിന്റെ നാള്‍വഴികളിലൂടെ..

സ്തുതിക്കുക, അനുഗ്രഹിക്കുക, പ്രസംഗിക്കുക, ധ്യാനിക്കുക, ധ്യാനിച്ചറിഞ്ഞവ പകര്‍ന്നേകുക എന്നീ ആദര്‍ശവാക്യങ്ങളിലൂന്നിയുള്ള  ഒരു സന്യാസിനീസമൂഹമാണ് പരിശുദ്ധ ത്രിത്വത്തിന്റെ ഡൊമിനിക്കന്‍ സന്യാസിനീ സമൂഹം. ഭാഗ്യസ്മരണാര്‍ഹരായ അഭിവന്ദ്യ മാര്‍ ജോസഫ് കുണ്ടുകുളം, ഫാ. ജോസഫ് വിളങ്ങാടന്‍  എന്നിവരുടെ നേതൃത്വത്തില്‍ 1966 ലാണ് ഇതിന് തുടക്കം കുറിക്കപ്പെട്ടത്. അതേ വര്‍ഷം ജര്‍മ്മനിയിലേക്ക് അയക്കപ്പെട്ട സി.ക്ലാര മാളിയേക്കല്‍, സി.ഡാനിയേല വാസുപുരത്തുകാരന്‍, സി. മാര്‍ട്ടീന ഇഞ്ചോടിക്കാരന്‍, സി.സെബസ്ത്യാന കരിയാറ്റി എന്നിവരാണ് സമൂഹത്തിലെ ആദ്യ അംഗങ്ങള്‍.  നിത്യവ്രതവാഗ്ദാനാനന്തരമാണ് അവര്‍  1975 ല്‍ കേരളത്തിലേക്ക് തിരികെയെത്തിയത്. അഭിവന്ദ്യ മാര്‍ ജോസഫ് ഇരുമ്പന്‍ പിതാവിന്റെ  അനുമതിയോടെ 1975 ഡിസംബര്‍ 17ന് പാലക്കാട് രൂപതയിലെ മണ്ണാര്‍ക്കാട്  ഹോളി സ്പിരിറ്റ് ഡൊമിനിക്കന്‍ കോണ്‍വെന്റ എന്ന പേരില്‍  പ്രഥമഭവനം ആരംഭിച്ചു. ഇതാണ് ഇന്ന് ഈ സമൂഹത്തിന്റെ ജനറലേറ്റ്. 1998 ജനുവരി 28ന് പരിശുദ്ധ ത്രിത്വത്തിന്റെ ഡൊമിനിക്കന്‍ സന്യാസിനീ  സമൂഹം  എന്ന ഔദ്യോഗിക നാമത്തില്‍ സീറോമലബാര്‍സഭയിലെ മേജര്‍ആര്‍ക്കിഎപ്പിസ്‌കോപ്പല്‍ പദവിയിലുള്ള സ്വതന്ത്രസന്യാസിനീസമൂഹമായി പ്രഖ്യാപിക്കപ്പെട്ടു. ലാന്‍സ്ബര്‍ഗ്ഗിലെ സമൂഹത്തിന്റെ അനുഗ്രഹാശിസ്സുകളും സി. ഗെര്‍ട്രുഡീസ്, സി. ഉള്‍റിക്ക എന്നിവരുടെ അക്ഷീണപ്രയത്‌നവും ഇതിന് പിന്നില്‍ പ്രധാനപങ്കുവഹിച്ചിട്ടുണ്ട്. 

ഇന്ന് ഈ സഭാസമൂഹത്തിന് 18 സന്യാസഭവനങ്ങളിലായി  102 സഹോദരിമാരുണ്ട്. പാലക്കാട്, തൃശൂര്‍, ഇരിഞ്ഞാലക്കുട, തലശേരി രൂപതകളിലും കേരളത്തിന് പുറത്ത് മംഗലാപുരം, ആന്ധ്ര, ആസാം, തെലങ്കാന, അരുണാചല്‍, ജര്‍മ്മനി എന്നിവിടങ്ങളിലും സിസ്റ്റേഴ്‌സ് ശുശ്രൂഷ ചെയ്യുന്നു.  സുവിശേഷപ്രഘോഷണമാണ് ഡൊമിനിക്കന്‍ കാരിസത്തിന്റെ അന്തസ്സത്ത.  വിദ്യാഭ്യാസം, ഭിന്നശേഷിയുള്ള കുഞ്ഞുങ്ങള്‍ക്കായുള്ള പരിശീലനം, ആതുരസേവനം, ഇടവക പ്രേഷിതത്വം, ധ്യാനകേന്ദ്രങ്ങളിലുള്ള ശുശ്രൂഷകള്‍, മിഷന്‍പ്രവര്‍ത്തനങ്ങള്‍, നിത്യാരാധന, കൗണ്‍സിലിംഗ്, വിശ്വാസപരിശീലനം, ഭവനസന്ദര്‍ശനം, വിവിധ ഭക്തസംഘടനകള്‍ക്ക് നേതൃത്വം കൊടുക്കല്‍, സ്ത്രീകളുടെ ഉന്നമനം ലക്ഷ്യമാക്കിയുള്ള സാമൂഹ്യപ്രവര്‍ത്തനങ്ങള്‍ എന്നിവയിലൂടെ ഡൊമിനിക്കന്‍ സിസ്റ്റേഴ്‌സ് തങ്ങളുടെ കാരിസം അനുസരിച്ചുശുശ്രൂഷ ചെയ്യുന്നു. ഡൊമിനിക്കന്‍ ആധ്യാത്മികത ആശ്രമജീവിതപരവും ധ്യാനദര്‍ശനപരവും പ്രേക്ഷിതപരവും ആണ്. ക്രിസ്തുവിനോടും അവിടുത്തെ വചനത്തോടുമുള്ള സ്‌നേഹവും ഭക്തിയും പരി. കന്യകാമറിയത്തോടും ജപമാലയോടുമുള്ള സ്‌നേഹം,പ്രേക്ഷിതചൈതന്യം, വിശുദ്ധവചനപഠനം, ആത്മാക്കളുടെ രക്ഷക്കായുള്ള തീക്ഷ്ണത, വ്യക്തിപരമായ വിശുദ്ധീകരണം, തിരുക്കര്‍മ്മ ജീവിതം, മൗനം, പരിഹാരജീവിതം എന്നിവ ഡൊമിനിക്കന്‍ ആധ്യാത്മികതയുടെ പ്രധാന ഘടകങ്ങളാണ്.