* 1993 ആഗസ്റ്റ് പത്തിന് താമരശേരിരൂപതയിലെത്തിയ സന്ന്യാസിനീസമൂഹമായ വിശുദ്ധ ഫിലിപ്പ്‌നേരി സിസ്റ്റേഴ്‌സിന്റെ സുവിശേഷാത്മകമായ പ്രവര്‍ത്തനങ്ങളെക്കുറിച്ച്

  1794 ഫെബ്രുവരി രണ്ടാം തീയതി ഫ്‌ളോറന്‍സില്‍ മദര്‍ ആഞ്ചേലാഗാമ്പിയും ഫാ. ഫെര്‍ഡിനാണ്ടോ ഫത്തോറാക്ഷിയും ചേര്‍ന്ന് സ്ഥാപിച്ചതാണ് വിശുദ്ധഫിലിപ്പ് നേരി സന്ന്യാസിനിസമൂഹം. ഫ്‌ളോറന്‍സിലെ വിശുദ്ധ ഫിലിപ്പ് നേരി സിസ്റ്റേഴ്‌സിന്റെ  വിവിധ  പ്രേഷിത പ്രവര്‍ത്തനങ്ങളിലും ആത്മീയതയിലും ആകൃഷ്ടനായ താമരശ്ശേരി രൂപതയുടെ പ്രഥമ മെത്രാന്‍ മാര്‍ സെബാസ്റ്റ്യന്‍ മങ്കുഴിക്കരി പിതാവ്  ഈ സന്യാസിനി സമൂഹം തന്റെ രൂപതയ്ക്ക് വലിയൊരു നേട്ടമായിരിക്കുമെന്ന് കരുതി അവരെ താമരശ്ശേരിയിലേക്ക് ക്ഷണിക്കുകയായിരുന്നു.  സന്യാസിനീ സമൂഹത്തിന്റെ അധികാരികള്‍ മിഷന്‍ പ്രവര്‍ത്തനത്തിനായുള്ള രണ്ടാം വത്തിക്കാന്‍ കൗണ്‍സില്‍ ഡിക്രീ അറ ഏലിലേ െന്റെ ചൈതന്യം ഉള്‍ക്കൊണ്ട് അഭിവന്ദ്യ പിതാവിന്റെ ക്ഷണം സ്വീകരിക്കുകയും പ്രേഷിത പ്രവര്‍ത്തനങ്ങള്‍ക്കും ദൈവവിളി പ്രോത്സാഹനത്തിനുമായി 1993 ആഗസ്റ്റ് പത്താം തീയതി താമരശ്ശേരി രൂപതയില്‍ എത്തിച്ചേരുകയും ചെയ്തു. രൂപതാ ഭവന്റെ അടുത്തായിട്ടാണ് അവര്‍ താമസമാരംഭിച്ചത്.

ഇക്കാലയളവില്‍ തന്നെ അര്‍ത്ഥിനികളെ സന്യാസ സമൂഹത്തിലേക്ക് സ്വീകരിക്കാനും ആരംഭിച്ചു.് രൂപതയിലെ പുതുപ്പാടി ഇടവകയില്‍ ഒരു മഠം ഇല്ലാത്തതിനാല്‍ മാര്‍ മങ്കുഴിക്കരി ആ ഇടവക നിര്‍ദ്ദേശിക്കുകയും അതനുസരിച്ച് പുതുപ്പാടി ഇടവകയില്‍ ആദ്യത്തെ മഠം സ്ഥാപിക്കുകയും ചെയ്തു. ഇന്ത്യയിലെ വിശുദ്ധ  ഫിലിപ്പ് നേരി സന്യാസിനി സമൂഹം 2021 ജനുവരി ആറാം തീയതി ദനഹാ തിരുനാള്‍ ദിവസം താമരശ്ശേരി രൂപതയിലെ എപ്പാര്‍ക്കിയല്‍  സന്യാസിനി സമൂഹമായി സ്ഥാപിക്കപ്പെട്ടു.  സന്തോഷത്തിന്റെ പ്രവാചകനായ വിശുദ്ധ ഫിലിപ്പ് നേരിയുടെ ആത്മീയത പിന്തുടര്‍ന്നുകൊണ്ട് ക്രിസ്തുവിന്റെ ആനന്ദത്തോടെ എല്ലാ ഹൃദയങ്ങളോടും സംവദിക്കുക എന്നതാണ് ഈ സന്യാസിനി സമൂഹത്തിന്റെ പ്രത്യേക കാരിസം. ഇടവക ശുശ്രൂഷകള്‍ക്കും യുവജനങ്ങളുടെയും കുട്ടികളുടെയും സന്മാര്‍ഗരൂപീകരണത്തിനുമായി ജീവിതം മാറ്റിവെച്ച വിശുദ്ധ ഫിലിപ്പ് നേരിയെ അനുകരിച്ച് കുട്ടികളെയും യുവജനങ്ങളെയും സന്മാര്‍ഗപാതയിലൂടെ നയിക്കുന്നതിനും കാലാനുസൃതമായി സഭയോടോത്ത് ചിന്തിച്ചും സഭയുടെ പ്രേഷിത നവീകരണ പ്രവര്‍ത്തനങ്ങളില്‍ പങ്കുചേര്‍ന്നും   വൃദ്ധസദനം, കെയര്‍ ഹോം, ഇടവക പ്രവര്‍ത്തനങ്ങള്‍, കൗണ്‍സിലിംഗ്, ആതുര ശുശ്രൂഷ, വിദ്യാഭ്യാസം,  മിഷന്‍ പ്രവര്‍ത്തനം, മതബോധനം, യുവജന പ്രേക്ഷിതത്വം,  എന്നീ മേഖലകളില്‍ പ്രവര്‍ത്തിച്ചും തങ്ങളുടെ ജീവിതം ഈ സഹോദരിമാര്‍ ദൈവജനത്തിനായി സമര്‍പ്പിച്ചിരിക്കുന്നു. മാലാഖമാരുടെ രാജ്ഞിയ്ക്ക് പ്രതിഷ്ഠിക്കപ്പെട്ട ഈ സമൂഹത്തിന്റെ സഹസംരക്ഷകര്‍ വിശുദ്ധ തോമസ് അക്വീനാസ് , വിശുദ്ധ ജോസഫ് കലാസന്‍സ്, വിശുദ്ധ മദര്‍ തെരേസ, വിശുദ്ധ അല്‍ഫോന്‍സാമ്മ എന്നിവരാണ്. കേരളത്തിലും പഞ്ചാബിലും ഇറ്റലിയിലും ജര്‍മ്മനിയിലുമായി 13 ഭവനങ്ങളില്‍,  69 സമര്‍പ്പിതര്‍ സേവനം ചെയ്തു വരുന്നു. വിശുദ്ധ ഫിലിപ്പ് നേരിയുടെ മാതൃക പിന്തുടര്‍ന്ന്   ‘നിങ്ങള്‍ ഒരേ കാര്യങ്ങള്‍ ചിന്തിച്ചുകൊണ്ട് ഒരേ സ്‌നേഹത്തില്‍ വര്‍ത്തിച്ചു, ഒരേ ആത്മാവും ഒരേ അഭിപ്രായവുമുള്ളവരായി എന്റെ സന്തോഷം പൂര്‍ണ്ണമാക്കുവിന്‍’ (മത്തായി 5:48) എന്ന തിരുവചനം ഓരോ  സമര്‍പ്പിതയും തങ്ങളുടെ വിവിധ പ്രേഷിത പ്രവര്‍ത്തനരംഗത്ത്  പ്രാവര്‍ത്തികമാക്കി കൊണ്ടിരിക്കുന്നു.