അരനൂറ്റാണ്ടിലധികമായി കേരളത്തിന്റെ മതസാമൂഹിക സാംസ്‌കാരിക മേഖലകളില്‍ ക്രിസ്തുവിനെ പകര്‍ന്നുനല്കുകയാണ് അമലോത്ഭവമാതാവിന്റെ പ്രേഷിതസന്യാസിനി സമൂഹം (ASMI)
ഭൗതിക ജീവിത സാഹചര്യങ്ങളുടെ കുത്തൊഴുക്കില്‍ ആടി ഉലയുന്ന കുടുംബങ്ങളെ വേദനയോടെ നോക്കികണ്ട കര്‍ദിനാള്‍ മാര്‍ ആന്റണി പടിയറ പിതാവ് പ്രാര്‍ഥനയിലൂടെ ലഭിച്ച ദൈവികപ്രചോദനമനുസരിച്ച് രൂപം നല്കിയതാണ് അമലോത്ഭവമാതാവിന്റെ പ്രേഷിത സന്യാസിനീസമൂഹം അഥവാ എഎസ്എംഐ. 1974 സെപ്തംബര്‍ 21 നായിരുന്നു സന്യാസിനിസമൂഹത്തിന്റെ ഔദ്യോഗികമായ തുടക്കം. തിരുസഭയുടെ അടിത്തറയും വ്യക്തിത്വരൂപീകരണത്തിന്റെ പിള്ളത്തൊട്ടിലുമായ കുടുംബങ്ങളെ നവീകരിക്കുക എന്ന ലക്ഷ്യത്തോടെയാണ് സന്യാസിനിസമൂഹം പ്രവര്‍ത്തിക്കുന്നത്. പരിപൂര്‍ണസമര്‍പ്പണം വഴി മിശിഹായുടെ രക്ഷാകരപദ്ധതിയില്‍ പങ്കുചേര്‍ന്ന അമലോത്ഭവമാതാവിനെ സ്വര്‍ഗീയമധ്യസ്ഥയായി സ്വീകരിച്ചിരിക്കുന്ന എഎസ്എംഐ, ഇടവകയോട് ചേര്‍ന്നു ജാതിമതഭേദമന്യേ കുടുംബനവീകരണം ലക്ഷ്യം വച്ച് പ്രവര്‍ത്തിക്കുന്നു.
ജീവിതത്തിലൂടനീളം മിശിഹായ്ക്ക് സാക്ഷ്യം വഹിക്കുക എന്നതാണ് അമലോത്ഭവമാതാവിന്റെ പ്രേഷിതസന്യാസിനി സമൂഹത്തിന്റെ ദര്‍ശനം. ജീവിതത്തെ മുഴുവനായി സ്പര്‍ശിക്കുന്ന ആത്മസമര്‍പ്പണം വഴി മിശിഹാനുകരണത്തിന്റെയും ദൈവൈക്യത്തിന്റെയും ജീവിതത്തിലൂടെ ലഭ്യമാകുന്ന രക്ഷാകരാനുഭവം കുടുംബപ്രേഷിതം, ഇടവകപ്രേഷിതം, വിദ്യാഭ്യാസം, ആതുരശുശ്രൂഷ, എന്നീ മാര്‍ഗങ്ങളിലൂടെ വ്യക്തികളും കുടുംബങ്ങളുമായി പങ്കുവയ്ക്കുന്നു. അതുവഴിയായി എല്ലാവരെയും ത്രി്‌തൈ്വക ദൈവത്തിന്റെ കൂട്ടായ്മയിലേക്ക് കൊണ്ടുവരിക എന്ന പ്രേഷിതദൗത്യമാണ് അമലോത്ഭവമാതാവിന്റെ പ്രേഷിതസന്യാസിനി സമൂഹം ഏറ്റെടുത്തിരിക്കുന്നത്. ശാരീരിക മാനസിക വൈകല്യമുള്ളവരുടെ സംരക്ഷണം, ആതുരശുശ്രൂഷ, ഹോംമിഷന്‍ സാമൂഹിക സേവനം, ഭിന്നശേഷിക്കാര്‍ക്കു വേണ്ടിയുള്ള സ്‌പെഷ്യല്‍ സ്‌കൂള്‍, നേഴ്‌സിംഗ് കെയ,ര്‍ പാലിയേറ്റീവ് കെയര്‍, ഡിസ്‌പെന്‍സറി, കൗണ്‍സിലിംഗ് തുടങ്ങിയ സേവനങ്ങളും കാലഘട്ടത്തിനു അനുസൃതമായി ഇവര്‍ കാഴ്ചവയ്ക്കുന്നു.
സീറോമലബാര്‍ സഭയുടെ വിവിധ രൂപതകളിലും ജര്‍മ്മനിയിലും ജയ്പ്പൂര്‍, ബിജ്‌നോര്‍ എന്നീ മിഷന്‍ കേന്ദ്രങ്ങളിലുമായി സഹോദരിമാര്‍ ശുശ്രൂഷ ചെയ്തുവരുന്നു. എ.എസ്.എം.ഐ സന്യാസിനി സമൂഹത്തിന്റെ ജനറലേറ്റ് ചങ്ങനാശേരിയുടെ സമീപപ്രദേശമായ ചീരഞ്ചിറയിലാണ്. 2004 ഡിസംബര്‍ എട്ടിന് എ.എസ്.എം.ഐ സന്യാസിനിസമൂഹം എപ്പാര്‍ക്കിയല്‍ പദവിയിലുള്ള കോണ്‍ഗ്രിഗേഷനായി ഉയര്‍ത്തപ്പെട്ടു. ദൈവത്തിന്റെ കരുതലും കരുണാര്‍ദ്രസ്‌നേഹവും ഇടപെടലുകളുമാണ് സമൂഹത്തിന്റെ വളര്‍ച്ചയിലുടനീളം കാണാന്‍ കഴിയുന്നത്. ‘എല്ലാ കാര്യങ്ങളിലും നന്ദി പ്രകാശിപ്പിക്കുവിന്‍. ഇതാണ് യേശുക്രിസ്തുവില്‍ നിങ്ങളെ സംബന്ധിച്ചുള്ള ദൈവഹിതം’ (1 തെസ 5/8) എന്ന പൗലോസ് ശ്ലീഹായുടെ ഉദ്‌ബോധനത്തിന് ജീവിതത്തിലൂടെ അര്‍ഥം നല്‍കിവരുന്നവരാണ് അമലോത്ഭവമാതാവിന്റെ പ്രേഷിതസന്യാസിനി സമൂഹാംഗങ്ങള്‍. ഈശോയുടെ സാന്നിധ്യമായി, സ്വര്‍ഗീയ ജീവിതത്തിന്റെ മുന്നാസ്വാദനമായി, ദൈവികശക്തിയുടെ ചാലുകളായി, സുവിശേഷത്തിന്റെ സാക്ഷികളായി, നൂറുമേനി വിളവുകൊയ്യുവാന്‍ എഎസ്എംഐ സഹോദരിമാര്‍ സദാ സന്നദ്ധരാണ്.
