പാലക്കാട് രൂപതയില്‍ 2014 സെപ്തംബര്‍ എട്ടിന് ബിഷപ് മാര്‍ ജേക്കബ് മനത്തോടത്തിന്റെ അഗീകാരത്തോടെ ഫാ. സേവ്യര്‍ ഖാന്‍ വട്ടായില്‍, ഫാ. ബിനോയ് കരിമരുതിങ്കല്‍, മദര്‍ എയ്മി എമ്മാനുവേല്‍ എന്നിവര്‍ ചേര്‍ന്ന് സ്ഥാപിച്ചതാണ് അഭിഷേകാഗ്നി സിസ്റ്റേഴ്സ് ( ASJM )എന്ന സമൂഹം. ‘മിശിഹായ്ക്കും സഭയ്ക്കും വേണ്ടി’ എന്ന ആദര്‍ശവാക്യം മുറുകെപിടിച്ചു ദൈവരാജശുശ്രൂഷയില്‍ ഏര്‍പ്പെട്ടിരിക്കുന്ന അഭിഷേകാഗ്നി സിസ്റ്റേഴ്‌സിനെക്കുറിച്ച്…
ഒരേ ഉള്‍വിളിയുടെ നെരിപ്പോട് ഉള്ളിലേറ്റി നടന്ന ASJMന്റെ ആത്മപാലകരായ ഫാ. സേവ്യര്‍ ഖാന്‍ വട്ടായില്‍, ഫാ. ബിനോയ് കരിമരുതിങ്കല്‍, മദര്‍ എയ്മി എമ്മാനുവേല്‍ എന്നിവരെ വ്യത്യസ്ത ജീവിതസാഹചര്യങ്ങളിലൂടെ പരിശീലിപ്പിച്ചും വളര്‍ത്തിയും 2007 ല്‍ സെഹിയോനില്‍ ദൈവം ഒരുമിപ്പിച്ചതിന്റെ ഫലമായിട്ടാണ് ASJM രൂപീകൃതമായത്. 2014 സെപ്തംബര്‍ എട്ടിന് പാലക്കാട് രൂപതയുടെ മുന്‍ ബിഷപ് മാര്‍ ജേക്കബ് മനത്തോടത്ത് ASJMന്റെ ആദ്യ സമൂഹത്തെ പയസ് യൂണിയനായി പ്രഖ്യാപിച്ചു. വിശുദ്ധ യോഹന്നാന്‍ ക്രൂസിന്റെ തിരുനാള്‍ദിനം കൂടിയായ 2017 ഡിസംബര്‍ 14ന് ASJM സ്വയാധികാര താപസഭവനം ആയി (sui iuris) ഉയര്‍ത്തപ്പെട്ടു. 2019 ല്‍ വിശുദ്ധ ചാവറ കുര്യാക്കോസ് ഏലിയാസച്ചന്റെ തിരുനാള്‍ദിനമായ ജനുവരി മൂന്നിന് ആദ്യ അംഗങ്ങളായ ആറ് സിസ്റ്റേഴ്‌സിന്റെ നിത്യവ്രതവാഗ്ദാനവും ആദ്യ ബാച്ചായ ഏഴ് നോവിസസ്സിന്റെ ആദ്യ വ്രതവാഗ്ദാനവും നടന്നു. ശുശ്രൂഷയ്ക്കായി നീക്കി വയ്ക്കുന്ന മാസത്തിലെ 15 ദിവസങ്ങളൊഴികെ ബാക്കിയുള്ള എല്ലാ ദിവസവും ആഴമേറിയ പ്രാര്‍ഥനയിലും ആധ്യാത്മികവിചിന്തനത്തിലും ചെലവഴിക്കുന്ന സമൂഹമാണ് അഭിഷേകാഗ്നി സിസ്റ്റേഴ്സ്.
വിടുതല്‍ശുശ്രൂഷ നിറഞ്ഞ വചനപ്രഘോഷണത്തിലൂടെയും കൃപാവരങ്ങള്‍ ഉപയോഗിച്ചുള്ള കൗണ്‍സിലിങ്ങിലൂടെയും ആന്തരികസൗഖ്യശുശ്രൂഷകളിലൂടെയും ലോകം മുഴുവനേയും പ്രത്യേകിച്ച് വൈദികരെയും സമര്‍പ്പിതരെയും ശക്തീകരിക്കാനും ഊര്‍ജ്ജസ്വലമായ ക്രൈസ്തവസമൂഹത്തെ ലോകം മുഴുവന്‍ കെട്ടിപ്പടുക്കാനുമാണ് അഭിഷേകാഗ്നി സിസ്റ്റേഴ്സ് ശ്രമിക്കുന്നത്. മിശിഹായുടെ മൗതികശരീരമായ തിരുസഭയെ ശക്തീകരിക്കുകയും യേശുവിന്റെ രണ്ടാമത്തെ ആഗമനത്തിനുമുമ്പ് ലോകസുവിശേഷവല്ക്കരണം സാധ്യമാക്കുകയും ചെയ്യുക എന്നതാണ് ലക്ഷ്യം. പരി. അമ്മയെപ്പോലെ ആഴമേറിയ ത്രിത്വാനുഭവം സ്വന്തമാക്കി താപസികതയില്‍ അടിയുറച്ച പ്രാര്‍ഥനയിലൂടെയും പരിശുദ്ധാത്മ അഗ്‌നി നിറഞ്ഞ വിടുതല്‍ ശുശ്രൂഷയിലൂടെയും തെരഞ്ഞെടുക്കപ്പെട്ടവരെയും ലോകം മുഴുവനെയും ഉജ്വലിപ്പിച്ച് തിരുസഭയെ പടുത്തുയര്‍ത്തുകയും ലോകസുവിശേഷവല്ക്കരണം സാധ്യമാക്കുകയുമാണ് അഭിഷേകാഗ്നി സിസ്റ്റേഴ്സ് ചെയ്തുകൊണ്ടിരിക്കുന്നത്.
പൂര്‍ണമായും ദൈവപരിപാലനയില്‍ ആശ്രയിച്ചും താപസജീവിതവും അപ്പസ്‌തോലിക ശുശ്രൂഷകളും സമന്വയിപ്പിച്ചുമാണ് ASJM മുന്നോട്ടു പോകുന്നത്. അട്ടപ്പാടി, വാഴക്കുളം, പത്തനംതിട്ട, മണ്ണുത്തി, ഒഡീഷ, ടെക്‌സസ് എന്നിവിടങ്ങളിലെ ആറ് ഭവനങ്ങളിലൂടെ അഭിഷേകാഗ്നി സിസ്റ്റേഴ്സ് സഭയെ സേവിക്കുകയും ഇന്ത്യയ്ക്കകത്തും പുറത്തും ASJM അതിന്റെ അപ്പസ്‌തോലികത വ്യാപിപ്പിക്കുകയും ചെയ്യുന്നു. അട്ടപ്പാടി സെഹിയോന്‍ റിട്രീറ്റ് സെന്ററിന് അടുത്തുള്ള താവളം അഭിഷേകാഗ്നിമൗണ്ടിലാണ് മദര്‍ഹൗസ്.
