ഞാനെന്ന ഭാവമാണ് അമിതമായ ആത്മാരാധനയെന്ന വ്യക്തിത്വ വൈകല്യത്തിന്റെ മുഖ്യലക്ഷണം (Narcissistic Personality Disorder). താന്‍ വലിയവന്‍, തന്നെ എല്ലാവരും അംഗീകരിക്കണം, വിമര്‍ശിക്കരുത്, വിമര്‍ശനം എനിക്കിഷ്ടമല്ല, ഇതാണ് ഈ വൈകല്യമുള്ളവരുടെ മനോഭാവം. പണവും പദവിയും പ്രശസ്തിയും കിട്ടാന്‍ ഇവര്‍ പരമാവധി ശ്രമിക്കും. പക്ഷെ ഇവര്‍ക്ക് ആത്മാഭിമാനവും (Self- esteem)  ആത്മവിശ്വാസവും വളരെ കുറവായിരിക്കുമെന്നാണ് പഠനങ്ങള്‍.. സാധാരണ ബാല്യകാലത്തുതന്നെ  ഈ ലക്ഷണങ്ങള്‍ പ്രത്യക്ഷമാകുന്നു. സ്ത്രീകളെക്കാള്‍ പുരുഷന്മാരിലാണ് ഈ അവസ്ഥ കൂടുതല്‍ കണ്ടുവരുന്നത്. പ്രായം കൂടുന്നതോടെ ഇതിന്റെ ഗാഢത കുറഞ്ഞുവരും.

ലക്ഷണങ്ങള്‍

ഊതിവീര്‍പ്പിക്കപ്പെട്ട സ്വയം പ്രാധാന്യം മനസ്സില്‍ നിറഞ്ഞ് നില്‍ക്കുക, താന്‍ സുപ്പീരിയറാണെന്ന് മറ്റുള്ളര്‍ കരുതണമെന്ന നിര്‍ബന്ധം, സ്വന്തം വിജയം, അധികാരം, സൗന്ദര്യം, പ്രാപ്തി ഇവയെപ്പറ്റിയുള്ള ഭാവനാലോകത്ത് കഴിയുക. തന്റെ അസാധാരണത്വം അസാധാരണ വ്യക്തികള്‍ക്ക് മാത്രമേ മനസ്സിലാകൂ എന്ന തോന്നലില്‍ ജീവിക്കുക, തന്നെ എപ്പോഴും ആളുകള്‍ പ്രശംസിക്കണം എന്ന നിര്‍ബന്ധം, തനിക്കുവേണ്ടി മറ്റുള്ളവരെ ഉപയോഗിക്കുന്ന രീതി, മറ്റുളളവരെ മാനിക്കാതിരിക്കുന്ന സ്വഭാവം, മറ്റുളളവരോട് സഹാനുഭൂതി തെല്ലും ഇല്ലാതിരിക്കുക, മറ്റുള്ളവരുടെ ആവശ്യങ്ങള്‍ നടപ്പിലാക്കാന്‍ വിമുഖത കാണിക്കുക, മറ്റുള്ളവരോട് അസഹിഷ്ണുതയും അസൂയയും തോന്നുക, മറ്റുള്ളവര്‍ക്ക് തന്നോട് അസൂയയാണെന്ന തെറ്റിദ്ധാരണ, യുക്തിയില്ലാത്ത, അമിത ആത്മവിശ്വാസം, താന്‍ ശരി മാത്രമെ ചെയ്യുന്നുള്ളൂ എന്ന തോന്നലില്‍ ജീവിക്കുക, സ്വയം വിമര്‍ശിക്കാനോ കുറ്റങ്ങള്‍ ഏറ്റുപറയാനോ ഉള്ള വിമുഖത.

നാര്‍സിസ്റ്റിക് പേഴ്‌സണാലിറ്റി പല തരത്തില്‍

ഗ്രാന്‍ഡിയോസ് (Grandiose)നാര്‍സിസ്റ്റ് 

വലിയ അഹങ്കാരം കാണിക്കുക, ഞാനാണ് ഏറ്റവും മികച്ചവന്‍, മറ്റുള്ളവരെ താഴെയാക്കുക, അധികാരം, പദവി, പേര് എന്നിവയ്ക്ക് അമിത പ്രാധാന്യം കൊടുക്കുക.

വള്‍ണറബിള്‍ (Vulnerable) നാര്‍സിസ്റ്റ് 

ഇത്തരക്കാര്‍ പുറമേക്ക് ശാന്തനും നിഷ്‌ക്കളങ്കനുമായിരിക്കും. അവരുടെ ഉള്ളില്‍ അമിത സ്വയം പ്രാധാന്യം ഉണ്ടായിരിക്കും. ഇവരില്‍  അസൂയയും ആത്മദുഃഖവും കൂടുതലായിരിക്കും.

മലിഗനന്റ് (Malignant) നാര്‍സിസ്റ്റ് 

ഏറ്റവും അപകടകരമായ തരമാണിത്. ക്രൂരത, മാനസികപീഡനം, മറ്റുള്ളവരെ നിയന്ത്രിക്കല്‍, ഭീഷണി, കുറ്റബോധമില്ലായ്മ എന്നിവ ഇവരില്‍ കൂടുതലായിരിക്കും.

കമ്മ്യൂണല്‍ (Communal) നാര്‍സിസ്റ്റ് 

ഞാന്‍ വളരെ നല്ല മനുഷ്യന്‍ എന്ന് സ്വയം കാണിക്കാന്‍ ശ്രമിക്കും.  സേവനം, സാമൂഹ്യപ്രവര്‍ത്തനം തുടങ്ങിയവ ഉപയോഗിച്ച് പ്രശംസ നേടാന്‍ ശ്രമിക്കും.

സോമാറ്റിക് (Somatic) നാര്‍സിസ്റ്റ് 

ശരീരസൗന്ദര്യം, ഫിറ്റ്‌നസ് എന്നിവയ്ക്ക് അമിതമായ പരിഗണന നല്‍കും. രൂപം, വസ്ത്രം, യുവത്വം എന്നിവയില്‍ അമിതശ്രദ്ധ കൊടുക്കും. മറ്റുളളവരെ ശരീരസൗന്ദര്യത്തിന്റെ അടിസ്ഥാനത്തില്‍ വിലയിരുത്തും.

സെറിബ്രല്‍ (Cerebral) നാര്‍സിസ്റ്റ് 

ഞാന്‍ ബുദ്ധിമാനാണ് എന്ന അമിതമായ അഭിമാനം കാണിക്കുന്നവരാണിവര്‍. അറിവ്, ഡിഗ്രികള്‍ എന്നിവയില്‍ ഇവര്‍ അഹങ്കരിക്കുന്നു.ജീവിതത്തില്‍ ചെറിയ തോതില്‍ ഇത്തരം ലക്ഷണം എല്ലാവര്‍ക്കും ഉണ്ടാകാം. ദൈനംദിന ജീവിതം, ബന്ധങ്ങള്‍, തൊഴില്‍ എല്ലാം തകര്‍ക്കുമ്പോഴാണ് നാര്‍സിസ്റ്റിക് പേഴ്‌സണാലിറ്റി ഡിസോര്‍ഡര്‍ ആയി രോഗനിര്‍ണയം ചെയ്യുന്നത്.

കാരണങ്ങള്‍

അമിതമായ പ്രശംസ അല്ലെങ്കില്‍ വിമര്‍ശനം, വിശ്വസനീയമല്ലാത്ത രക്ഷാകര്‍തൃത്വം എന്നിവ പോലുള്ള ബാല്യകാല അനുഭവങ്ങള്‍ നാര്‍സിസ്റ്റിക് പേഴ്‌സണാലിറ്റി ഡിസോര്‍ഡറിന് കാരണമാകുന്നു. ജനിതകവും ജീവശാസ്ത്രപരവുമായ കാരണങ്ങളും ഗണ്യമായ പങ്ക് വഹിക്കുന്നു.

മനഃശാസ്ത്ര സമീപനങ്ങള്‍

നാര്‍സിസ്റ്റ് പേഴ്‌സണാലിറ്റി ഡിസോര്‍ഡറിനുള്ള പ്രാഥമികചികിത്സ മരുന്നിനെക്കാള്‍ സൈക്കോതെറാപ്പി ആണെന്ന് മനസിലാക്കുക. വിഷാദം, ക്ഷോഭം അല്ലെങ്കില്‍ ഉത്കണ്ഠ പോലുള്ള ചില മാനസിക രോഗലക്ഷണങ്ങളെ പരിഹരിക്കുന്നതിന് മരുന്ന് ഉചിതമായിരിക്കും.  തെറാപ്പി സമയത്ത് തകരാറുള്ള വ്യക്തി തെറാപ്പിസ്റ്റുമായി എങ്ങനെ ഇടപഴകുന്നു, വ്യക്തിയുടെ മഹത്തായ ആത്മബോധം, ദുര്‍ബലചിന്ത എന്നിവ പരിശോധിക്കുകയും മാറ്റുകയും ചെയ്യുക, അവരുടെ വികാരങ്ങളെ നിയന്ത്രിക്കുന്നതിനുളള മാര്‍ഗങ്ങള്‍ പഠിപ്പിക്കുക, സ്വയം കേന്ദ്രീകൃത സ്വഭാവങ്ങള്‍ കൂടുതല്‍ ആരോഗ്യകരമാക്കുകയും ചെയ്യുക എന്നിവയില്‍ സൈക്കോതെറാപ്പി ശ്രദ്ധ കേന്ദ്രീകരിക്കുന്നു.

റവ. ഡോ.സിജോണ്‍ കുഴിക്കാട്ടുമ്യാലില്‍