ഇന്ത്യയിലെ സുവിശേഷപ്രഘോഷണത്തിന്റെ ഭാഗമായി വടക്കേഇന്ത്യയിലും തെക്കേ ഇന്ത്യയിലെ പല പട്ടണങ്ങളിലും തോമാശ്ലീഹാ സഭാസമൂഹത്തിന് രൂപം കൊടുത്തു. പാര്ത്യരാജ്യത്തിന്റെ ഭാഗമായിരുന്ന വടക്കേ ഇന്ത്യയില് തന്റെ ആദ്യ പ്രേഷിതയാത്രയുടെ സമയത്തും കേരളം ഉള്പ്പെടുന്ന ‘തമിഴകം’ എന്നറിയപ്പെട്ടിരുന്ന തെക്കേ ഇന്ത്യയില് രണ്ടാമത്തെ പ്രേഷിതയാത്രയിലുമാണ് സഭയ്ക്ക് ആരംഭം കുറിച്ചത്.
തെക്കേ ഇന്ത്യയിലെ രണ്ടാമത്തെ പ്രധാന പട്ടണം ആയിരുന്നു മൈലാപ്പൂര്. ഒന്നാമത്തെ പ്രധാന പട്ടണം കേരളത്തില് മലബാര് തീരത്തുള്ള മുസ്സിരിസും. അന്നത്തെ ഇന്ത്യയിലെ നാലാമത്തെ പ്രധാന പട്ടണം ആയിരുന്നു മൈലാപ്പൂര്. ഗുജറാത്തിലെ ബാറുച്ച്, കേരളത്തിലെ മുസിരിസ്, പാക്കിസ്ഥാനിലെ ഇപ്പോഴുള്ള തക്ഷശില എന്നിവയായിരുന്നു പ്രാധാന്യത്തില് ഒന്നും രണ്ടും മൂന്നും സ്ഥാനങ്ങളില്. ഈ നാലു പട്ടണങ്ങളില് മൈലാപ്പൂരിന് ഒരു പ്രത്യേകസ്ഥാനം ഉണ്ടായിരുന്നു. അതായത്, ചൈന ഉള്പ്പെടുന്ന കിഴക്കന് രാജ്യങ്ങളിലേക്കുള്ള കവാടമായി (Gateway to the East) കണക്കാക്കപ്പെട്ടിരുന്നു. അതിനാല് തെക്കേ ഇന്ത്യയിലെ പ്രധാന പട്ടണങ്ങളായ മുസിരിസ് പടിഞ്ഞാറേയ്ക്കുള്ള കവാടവും മൈലാപ്പൂര് കിഴക്കോട്ടുള്ള കവാടവുമായി പരിഗണിക്കപ്പെട്ടിരുന്നത് ഈ രണ്ടു പട്ടണങ്ങളുടെയും പ്രാധാന്യം എടുത്തു കാണിക്കുന്ന കാര്യങ്ങളാണ്. ഇവയില് മുസിരിസ് തോമാശ്ലീഹാ വന്നിറങ്ങിയ സ്ഥലവും മൈലാപ്പൂര് അപ്പസ്തോലന് അന്ത്യവിശ്രമം നല്കിയതുമായ സ്ഥലങ്ങളുമാണ്. മൈലാപൂരിലെ തോമാശ്ലീഹായുടെ രക്തസാക്ഷിത്വം ഈ പട്ടണത്തെ മാര്തോമാ ക്രിസ്ത്യാനികളുടെ, ഭാരതക്രൈസ്തവരുടെ ഏറ്റവും പ്രിയപ്പെട്ട, പ്രധാനപ്പെട്ട സ്ഥലമാക്കിതീര്ത്തു. ഭാരതസഭയുടെ തുടക്കവും കേന്ദ്രസ്ഥാനവും മൈലാപ്പൂര് എന്ന് തന്നെ പറയാം. ആദ്യ നൂറ്റാണ്ടുകളില് സഭാകേന്ദ്രമായി പ്രവര്ത്തിച്ചിരുന്നത് മൈലാപ്പൂര് ആയിരുന്നു. മധ്യനൂറ്റാണ്ടുകളുടെ ആരംഭഘട്ടത്തില് കൊല്ലവും തുടര്ന്ന് കൊടുങ്ങല്ലൂരും സഭാകേന്ദ്രങ്ങളായി ഭവിച്ചു. ഏഴാം നൂറ്റാണ്ടു മുതല് പോര്ച്ചുഗീസുകാരുടെ ആഗമനം (പതിനഞ്ചാം നൂറ്റാണ്ടിന്റെ അന്ത്യം) വരെ കൊടുങ്ങല്ലൂരായിരുന്നു മാര്തോമാ ക്രിസ്ത്യാനികളുടെ മെത്രാപ്പോലീത്തമാര് താമസിച്ചിരുന്നത് എന്നാണ് പോര്ച്ചുഗീസ് രേഖകളിലുള്ളത്. തോമാശ്ലീഹാ രക്തസാക്ഷിത്വം വരിച്ചതും ശ്ലീഹായെ കബറടക്കിയതും മൈലാപ്പൂരിലാണ് എന്ന് തെളിയിക്കുന്ന അനേകം ചരിത്രരേഖകള് ഉണ്ട്. മൂന്നാം നൂറ്റാണ്ടിന്റെ ആരംഭത്തില് വിരചിതമായ (തോമായുടെ നടപടികള്) എന്ന ഗ്രന്ഥമാണ് ഏറ്റവും പ്രധാന തെളിവ്. ഈ ഗ്രന്ഥത്തിന്റെ പതിമൂന്നാം അധ്യായത്തില് തോമായുടെ രക്തസാക്ഷിത്വം വളരെ വിശദമായി ചിത്രീകരിക്കുന്നുണ്ട്. അനേകം സഭാ പിതാക്കന്മാര് തോമാശ്ലീഹായുടെ രക്തസാക്ഷിത്വവും കബറിടവും സംബന്ധിച്ച വളരെയേറെ കാര്യങ്ങള് അവരുടെ ഗ്രന്ഥങ്ങളില് കുറിച്ചിട്ടുള്ളത് ഇന്ന് നമുക്ക് ലഭ്യമാണ്. പുരാവസ്തു ഗവേഷണ പഠനങ്ങളും വിദേശയാത്രികരുടെ വിവരണങ്ങളും ഇക്കാര്യം തെളിയിച്ചിട്ടുണ്ട്. മൈലാപ്പൂരിലെ തോമായുടെ കബറിടം വളരെ പൂജ്യനീയം ആയിട്ടാണ് പഴയ നൂറ്റാണ്ടുകളില് കരുതിയിരുന്നതെന്ന് പോര്ച്ചുഗീസ് ചരിത്രഗ്രന്ഥങ്ങള് സാക്ഷ്യപ്പെടുത്തുന്നുണ്ട്. ക്രൈസ്തവര് മാത്രമല്ല അക്രൈസ്തവരും ഭയഭക്ത്യാദരവുകളോടെയാണ് ഈ പൂജ്യസ്ഥലം കണ്ടിരുന്നത് എന്നും അവര് രേഖപ്പെടുത്തിയിട്ടുണ്ട്. തോമായുടെ കബറിടം മാര്തോമാ ക്രിസ്ത്യാനികളുടെ ആധ്യാത്മികജീവിതത്തില് സുപ്രധാന പങ്ക് വഹിച്ചിരുന്നു. മൈലാപ്പൂര് കബറിടത്തിങ്കലേക്കുള്ള തീര്ഥാടനങ്ങള് അവര് പതിവായി നടത്താറുണ്ടായിരുന്നു. മൈലാപ്പൂര് തീര്ഥാടനം ജീവിത സായൂജ്യമായാണ് ക്രൈസ്തവര് കരുതിയിരുന്നത്. മൈലാപ്പൂരില് നിന്ന് കൊണ്ടുവന്നിരുന്ന തിരുശേഷിപ്പായ മണ്ണ് രോഗങ്ങള് സുഖപ്പെടുത്താന് വരെ ശക്തിയുള്ളതായിരുന്നുവെന്ന് അവര് വിശ്വസിച്ചിരുന്നു.
റവ. ഡോ. ജയിംസ് പുലിയുറുമ്പില്
