രൂപതാ പദവിയിലുള്ള ഒരു സന്ന്യാസിനി സമൂഹമാണ് മിഷനറീസ് ഓഫ് ലിറ്റിൽ ഫ്ളവർ 1992 ൽ ചങ്ങനാശ്ശേരി അതിരൂപതയിൽ സ്ഥാപിതമായ, അഖിലലോക മിഷൻ മധ്യസ്ഥയും വേദപാരംഗതയുമായ ലിസ്യുവിലെ വിശുദ്ധ കൊച്ചുത്രേസ്യയെ മധ്യസ്ഥയായി സ്വീകരിച്ചുകൊണ്ടുള്ള, രൂപതാ പദവിയിലുള്ള ഒരു സന്ന്യാസിനി സമൂഹമാണ് മിഷനറീസ് ഓഫ് ലിറ്റിൽ ഫ്ളവർ.(എംഎൽഎഫ്). ക്രാന്തദർശിയും സഭാപണ്ഡിതനുമായ അഭിവന്ദ്യ മാർ ജോസഫ് പവ്വത്തിൽ പിതാവാണ് സഭയുടെ സ്ഥാപകൻ. 32 വർഷങ്ങളായി ചങ്ങനാശ്ശേരി അതിരൂപതയിലും കേരളത്തിലെ മറ്റു സീറോമലബാർ രൂപതകളിലും ആഗ്ര മിഷൻ, അദിലാബാദ് രൂപത, ജർമ്മനി, ഇറ്റലി എന്നിവിടങ്ങളിലും ഈ സമൂഹാംഗങ്ങൾ വിവിധ ശുശ്രൂഷകളിലൂടെ ക്രിസ്തുവിന് സാക്ഷ്യം വഹിക്കുന്നു.
സ്ഥാപകപിതാവിന്റെ വാക്കുകളിൽ സമർപ്പിതജീവിതം എന്ന് പറയുന്നത് സഭയോടൊത്തുള്ള ജീവിതമാണ്. സന്യാസം സഭയിലാണ്, സഭയ്ക്ക് വേണ്ടിയുള്ളതും സഭയ്ക്ക് ഉള്ളിലും ആണ് എന്ന സ്ഥാപകപിതാവിന്റെ വാക്കുകളാണ് ഈ സന്യാസസമൂഹത്തിന് മാർഗദർശനം നൽകുന്നത്. അതുകൊണ്ടുതന്നെ സഭാത്മക ജീവിതത്തിന് എംഎൽഎഫ് സഭ പ്രാധാന്യം നൽകുന്നു. എല്ലാ പ്രവർത്തനങ്ങളുടെയും അടിസ്ഥാനമായി തിരുസഭയുടെ വളർച്ചയാണ് ലക്ഷ്യം വയ്ക്കുന്നതും.
ആതുരശുശ്രൂഷ പ്രവർത്തനങ്ങൾ, വൃദ്ധമന്ദിരങ്ങൾ, കാൻസർ പാലിയേറ്റീവ് കെയർ യൂണിറ്റ്, വിദ്യാഭ്യാസ പ്രവർത്തനങ്ങൾ, മതബോധനം, ഇടവക പ്രവർത്തനങ്ങൾ, സമൂഹത്തിന്റെ കാലിക ആവശ്യങ്ങൾ കണക്കിലെടുത്തുകൊണ്ടുള്ള ഇതര സാമൂഹിക പ്രവർത്തനങ്ങൾ എന്നിവയിലാണ് ഈ സഹോദരിമാർ സജീവമായി പ്രവർത്തിക്കുന്നത്. കേരളത്തിൽ കുടുംബങ്ങളുടെ നവീകരണത്തെ ലക്ഷ്യം വെച്ചുകൊണ്ട് ഭവന സന്ദർശനം, ഹോം മിഷൻ, കൗൺസിലിംഗ്, യുവജനങ്ങൾ ബാലികബാലന്മാർക്കായി പ്രത്യേക ധ്യാന പ്രോഗ്രാമുകൾ, ക്രിസ്റ്റീൻ ധ്യാനം, ഇടവകയിലെ വിവിധ സംഘടനകളുടെ നേതൃത്വം എന്നിവയും നിർവഹിക്കുന്നു. ലോകമെങ്ങും പോയി സുവിശേഷം പ്രസംഗിക്കുവിൻ എന്ന മിശിഹാ ഭരമേൽപ്പിച്ച ദൗത്യത്തിലും ഇവർ പങ്കാളികളാകുന്നു. ഈ സമൂഹത്തിൽ 150 അംഗങ്ങളാണ് ഉള്ളത്. സിസ്റ്റർ മെർലിൻ ജേക്കബ് ആണ് മദർ ജനറൽ.
സി. മെർലിൻ ജേക്കബ് എം എൽ എഫ്
