പാലായുടെ മണ്ണിൽ പിറവിയെടുത്ത് വളർന്നുപന്തലിച്ച സ്നേഹഗിരി മിഷനറി സിസ്റ്റേഴ്സിന്റെ നാൾവഴികളിലൂടെ…
“എന്റെ ഏറ്റവും എളിയ ഈ സഹോദരന്മാരിൽ ഒരുവന് നിങ്ങൾ ഇതു ചെയ്തുകൊടുത്തപ്പോൾ എനിക്കു തന്നെയാണ് ചെയ്തുതന്നത്” (മത്താ 25: 40) എന്ന യേശുക്രിസ്തുവിന്റെ വചനം ഉൾക്കൊണ്ടു പാലാ രൂപതയുടെ പ്രഥമ മെത്രാനായിരുന്ന ദിവംഗതനായ അഭിവന്ദ്യ മാർ സെബാസ്റ്റ്യൻ വയലിൽ പിതാവിന്റെ അനുഗ്രഹ ആശീർവാദത്തോടും അംഗീകാരത്തോടും കൂടി പാലാ രൂപതയിലെ ഫാ. അബ്രാഹം കൈപ്പൻപ്ലാക്കൽ 1969 മെയ് 24 ന് തുടക്കമിട്ട സന്ന്യാസിനി സമൂഹമാണ് സ്നേഹഗിരി മിഷനറി സിസ്റ്റേഴ്സ് (SMS).സമൂഹത്തിലെ അവശരും ആലംബഹീനരും ഉപേക്ഷിക്കപ്പെട്ടവരുമായവരുടെ ഇടയിൽ യേശുവിന്റെ കരുണാർദ്രസ്നേഹത്തിന് സാക്ഷ്യംവഹിക്കുന്ന ഈ സമർപ്പിത സന്ന്യാസിനി സമൂഹം ഇന്ന് സീറോമലബാർസഭയിലെ ഒരു മേജർആർക്കി എപ്പിസ്ക്കോപ്പൽ സന്ന്യാസിനി സമൂഹമാണ്.
കഴിഞ്ഞ 56 വർഷത്തിനിടയിലെ സ്നേഹഗിരി സന്യാസിനി സമൂഹത്തിന്റെ വളർച്ചയും ഉയർച്ചയും ദൈവാനുഗ്രഹത്തിന്റെ പ്രതിഫലനമാണ്. സമൂഹത്തിൽ നിന്നും മാറ്റിനിർത്തപ്പെട്ട്, അനാഥരും അവഗണിക്കപ്പെട്ടവരും ഒറ്റപ്പെടലുകൾ അനുഭവിക്കുന്നവരുമായവർക്ക്, ഈശോയുടെ കരുണാർദ്രസ്നേഹം പകരുന്ന, ആതുരശുശ്രൂഷയാണ് സ്നേഹഗിരി മിഷനറി സന്ന്യാസിനി സമൂഹത്തിന്റെ കാരിസം. സ്നേഹഗിരിക്ക് ഇന്ന് 525 സിസ്റ്റേഴ്സും രൂപീകരണത്തിൽ 25 അർത്ഥിനികളുമാണുള്ളത്. ഇന്ത്യയിലും വിദേശത്തും 26 രൂപതകളിലായി 117 ഭവനങ്ങളുമുണ്ട്. സ്നേഹഗിരി സിസ്റ്റേഴ്സിന്റെ കാരുണ്യപ്രവൃത്തികളുടെ തണലിൽ 6,000 ത്തോളം ദൈവമക്കൾ സന്തോഷത്തോടെ കഴിയുന്നു. ബാലഭവനങ്ങൾ, വൃദ്ധസദനങ്ങൾ, ശാരീരിക വൈകല്യമുളളവർക്കായുള്ള ഭവനങ്ങൾ, ശാരീരികമാനസിക വെല്ലുവിളികൾ നേരിടുന്ന മക്കൾക്കും, മാനസികരോഗികൾക്കുമായുളള ഭവനങ്ങൾ, കാൻസർരോഗികൾക്കായുള്ള പാലിയേറ്റീവ് കെയർസെന്ററുകൾ തുടങ്ങിയവയാണ് സ്നേഹഗിരി മിഷനറി സന്യാസിനി സമൂഹത്തിന്റെ ശുശ്രൂഷാമേഖലകൾ. അതോടൊപ്പം സ്പെഷ്യൽ സ്കൂളുകൾ, ടെയ്ലറിംഗ് എബ്രേയ്ഡറി, ക്രാഫ്റ്റ് സെന്റ്റ്റുകൾ, ഓസ്തി നിർമ്മാണം, പ്രിന്റിംഗ് പ്രസ്സ് തുടങ്ങി വിവിധ തരത്തിലുള്ള പരിശീലന കേന്ദ്രങ്ങൾ സ്നേഹഗിരി സിസ്റ്റേഴ്സിന്റെ ഉത്തരവാദിത്വത്തിൽ നടത്തപ്പെടുന്നു. കൂടാതെ മതബോധനം, ഭവനസന്ദർശനം, പ്രാർഥനാ ശുശ്രൂഷകൾ, ബൈബിൾ ക്ലാസ്സുകൾ, ഹോം മിഷൻ പ്രോഗ്രാം, പാവപ്പെട്ട കുട്ടികൾക്ക് പ്രാഥമിക വിദ്യാഭ്യാസം, ഹെൽത്ത് കെയർ ക്ലിനിക്കുകൾ, ഫാമിലി അപ്പസ്റ്റൊലേറ്റ്, കൗൺസിലിംഗ് തുടങ്ങിയ ശുശ്രൂഷകളും നിർവ്വഹിക്കുന്നു.
1993-1994 വർഷങ്ങളിൽ സ്നേഹഗിരി സന്യാസിനി സമൂഹത്തിന്റെ രജതജൂബിലി ആഘോഷിച്ചു. 1994 ൽ സ്നേഹഗിരി മിഷനറി സന്യാസിനി സമൂഹത്തെ രൂപതാ സന്യാസിനി സമൂഹമായി ഉയർത്തി. 2006 സെപ്റ്റംബർ 3 ന് സീറോമലബാർ സഭയുടെ അന്നത്തെ മേജർ ആർച്ചുബിഷപ്പായിരുന്ന ദിവംഗതനായ അഭിവന്ദ്യ കർദിനാൾ മാർ വർക്കി വിതയത്തിൽ സ്നേഹഗിരി മിഷനറി സന്യാസിനി സമൂഹത്തെ മേജർആർക്കി എപ്പിസ്കോപ്പൽ പദവിയിലേക്ക് ഉയർത്തി. 2008 ൽ എസ്.എം.എസ് ജനറലേറ്റിൽ നടന്ന ജനറൽ സിനാക്സിസിൽ സന്യാസി സമൂഹം മൂന്നു പ്രൊവിൻസുകളായി വിഭജിക്കപ്പെട്ടു. സെന്റ് തോമസ് പ്രോവിൻസ് പാലാ, സെന്റ് മേരീസ് പ്രോവിൻസ് കോതമംഗലം, സെന്റ് ജോസഫ്സ് പ്രോവിൻസ് മലബാർ. 2014 ൽ സെന്റ് മേരീസ് പ്രൊവിൻസ് കോതമംഗലത്തിന്റെ കീഴിൽ ജഗദൽപ്പൂർ മിഷനിൽ ‘സ്നേഹാത്മാ’ റീജിയൻ സ്ഥാപിക്കപ്പെട്ടു.
2014 മെയ് 4 ന് സ്ഥാപക പിതാവ് ബഹു. അബ്രാഹം കൈപ്പൻപ്ലാക്കലച്ചൻ തന്റെ 101 ാം വയസ്സിൽ നിത്യസമ്മാനത്തിനായി വിളിക്കപ്പെട്ടു. 2018-2019 ൽ സ്നേഹഗിരി സന്യാസിനി സമൂഹം സുവർണ്ണ ജൂബിലി ആഘോ ഷിച്ചു. പരിശുദ്ധ കുർബാനയിൽനിന്നും ശക്തിയും ചൈതന്യവും സ്വീകരിച്ച്, സർവ്വോപരി സ്ഥാപകപിതാവിന്റെ കാരിസം അവികലമായി കാത്തുസൂക്ഷിച്ച്, ജാതിമതഭേദമെന്യേ അശരണരും ആലംബഹീനരും പാവപ്പെട്ടവരുമായ ആബാലവൃദ്ധം സഹോദരങ്ങൾക്ക് തങ്ങളുടെ എളിയശുശ്രൂഷയിലൂടെ ദൈവത്തിന്റെ കരുണയും സ്നേഹവും പങ്കുവയ്ക്കുവാൻ സ്നേഹഗിരി മിഷനറി സന്യാസിനി സമൂഹം നിതാന്തശ്രദ്ധ ചെലു ത്തുന്നു.
സി. പീയൂഷ എസ്. എം. എസ്
മദർ ജനറൽ
