ജായ്റോസിന്റെ മകളെ പുനർജീവിപ്പിക്കുന്ന സംഭവം ബൈബിൾ രചനയിൽ സാൻവിച്ച് തിയറി (sandwich theory) പ്രകാരം എഴുതപ്പെട്ട വചനഭാഗമാണ് എന്ന് പണ്ഡിതർ അഭിപ്രായപ്പെടുന്നു. സാൻവിച്ച് പോലെ, ഒരു അത്ഭുത-വിവരണത്തിന്റെ നടുവിലായി മറ്റൊരു അത്ഭുതം ക്രമീകരിച്ചിരിക്കുകയാണ് ഇവിടെ. ജായ്റോസിന്റെ രോഗബാധിതയായ മകളെ ഉയിർപ്പിക്കാൻ പോകുന്ന വഴിയിൽ വച്ചാണ് രക്തസ്രാവക്കാരി സ്ത്രീയെ ഈശോ സുഖപ്പെടുത്തുന്നത്.
ലൂക്കാ സുവിശേഷം അറിയപ്പെടുന്നത് തന്നെ കരുണയുടെ സുവിശേഷം എന്നാണ്. കരുണാമയനായ പുത്രൻതമ്പുരാനെ ഇത്രത്തോളം മനോഹരമായി ചിത്രീകരിച്ചിരിയ്ക്കുന്ന മറ്റൊരു സുവിശേഷമില്ല. മാത്രമല്ല ഭിഷഗ്വരൻ ആയതിനാൽ രോഗശാന്തിവിവരണങ്ങളൊക്കെ അങ്ങേയറ്റം തന്മയത്വത്തോടെയാണ് ലൂക്കാ വിവരിക്കുന്നത്.
ജായ്റോസും രക്തസ്രാവക്കാരിസ്ത്രീയും മാത്രമല്ല അനേകമനേകം ആളുകൾ അവന്റെ കരുണ ആവോളം നുകർന്നവരാണ്. അൾത്താരകളും, കുമ്പസാരക്കൂടുകളും, വചനവേദികളും അവന്റെ കരുണയുടെ വിളമ്പിടങ്ങളായി ഇന്നും തുടരുകയാണ്. നോക്കൂ, സഹോദരാ/സഹോദരീ. കരയുന്നവന്റെ / മനസിടിഞ്ഞവന്റെ / രോഗിയുടെ വേദനകളിൽ അവന് കൂട്ടിരിക്കുന്ന നല്ല ശമറായനാണ് നമ്മുടെ ദൈവം. എല്ലാ രോഗശാന്തിവിവരണങ്ങളിലും വെളിപ്പെടുന്നത് അവന്റെ ഈ കരുണയാണ്.
ഒപ്പം, സാൻവിച്ച് പോലെയുള്ള ഒരു ഹൃദയമുണ്ടോയെന്ന്..?
ഞാനും നീയുമൊക്കെ എത്രത്തോളം ദൈവകരുണയെ മറ്റുള്ളവർക്കായി പങ്കുവയ്ക്കുന്നുണ്ട് എന്നൊരു ചോദ്യം കൂടി..
ജീവിതകാലം മുഴുവൻ അവന്റെ കരുണ അനുഭവിക്കാൻ, അവൻ വച്ച് നീട്ടുന്ന സൗഖ്യം അനുഭവിക്കാൻ ദൈവം കൃപ തരട്ടെ. ശുഭദിനം സ്നേഹപൂർവം..
ഫാ. അജോ രാമച്ചനാട്ട്
