വിശുദ്ധ മത്തായിയുടെ സുവിശേഷത്തിലെ 1:25 ഉം 13:55 ഉം തെറ്റായി വ്യാഖ്യാനിച്ച്, യേശുവിന്റെ ജനനത്തിന് ശേഷം മറിയത്തിന് മറ്റു മക്കളുണ്ടെന്നും അവരുടെ പേരുകളാണ് യേശുവിന്റെ സഹോദരന്മാര്‍ എന്ന് മത്തായി 13:55 വിവരിക്കുന്ന യാക്കോബ്, ജോസഫ്, ശിമയോന്‍, യൂദാ എന്നിവരെന്നും തെറ്റായി പഠിപ്പിക്കുന്ന പ്രവണത ഇന്നും നിലനില്‍ക്കുന്നു. എന്നാല്‍ സുവിശേഷങ്ങളിലെ വിവിധ വചനങ്ങള്‍ ഒരുമിച്ച് പരിശോധിക്കുമ്പോള്‍, മത്തായി 13:55ല്‍ പരാമര്‍ശിക്കുന്ന ‘യേശുവിന്റെ സഹോദരന്മാര്‍’ മറിയത്തിന്റെ മറ്റു മക്കളായിരുന്നില്ലെന്ന് മനസ്സിലാക്കാന്‍ സാധിക്കും.
പുത്രനെ പ്രസവിക്കുന്നത് വരെ അവന് അവളെ അറിഞ്ഞില്ല (മത്തായി 1:25)
ഇവിടെ ഉപയോഗിച്ചിരിക്കുന്ന ‘വരെ’ എന്ന പദം, ഗ്രീക്കിലെ ‘ഹെയാസ്’ എന്ന വാക്കാണ്. ഈ പദം യേശുവിന്റെ ജനനത്തിനുശേഷം ജോസഫും മേരിയും സാധാരണ വിവാഹബന്ധം തുടര്‍ന്നു എന്ന് ധ്വനിപ്പിക്കുന്നില്ല. ‘ഹെയാസ്’ ‘വരെ’ എന്ന ഗ്രീക്ക് വാക്ക് ഒരു കാലപരിധിയെ സൂചിപ്പിക്കുന്നു. എന്നാല്‍ ആ കാലപരിധിക്ക് ശേഷം അതിന് വിപരീതസ്ഥിതി സംഭവിക്കുമെന്ന് ഒരിക്കലും അര്‍ഥം നല്‍കുന്നില്ല. ഉദാഹരണമായി 2 സാമുവല്‍ 6:23 ല്‍ നാം വായിക്കുന്നു സാവൂളിന്റെ പുത്രി മിഖാലിനു മരണം ‘വരെ’ കുട്ടിയുണ്ടായില്ല. ഇവിടെ ഗ്രീക്ക് പദമായ ‘ഹെയോസ്’ ആണ് ഉപയോഗിക്കുന്നത്. ഇവിടെയും മരണം കഴിഞ്ഞ് കുട്ടികള്‍ ഉണ്ടായി എന്ന് ഒരിക്കലും അര്‍ഥം വരുന്നില്ല. വീണ്ടും തിമോത്തിയോസിനെഴുതിയ ഒന്നാം ലേഖനം 4:13 ല്‍ ‘ഹെയാസ്’ ‘വരെ’ എന്ന പദം കാണുന്നു. ഞാന്‍ വരുന്നത് വരെ പാരായണത്തില്‍… ശ്രദ്ധാലുവായിരിക്കണം. ആയതിനാല്‍ ‘വരെ’ എന്ന പദം നിശ്ചിത സമയപരിധിക്ക് ശേഷം അതിന്റെ വിപരീതം സംഭവിക്കുമെന്ന് ഒരിക്കലും ഉറപ്പുനല്‍കുന്നില്ല. അതിനാല്‍ മത്തായി 1:25 ല്‍ യേശുവിന്റെ ജനനത്തില്‍ ജോസഫിന് യാതൊരു പങ്കുമില്ല എന്നത് മാത്രമാണ് മത്തായി സുവിശേഷകന്‍ സ്ഥാപിക്കുന്നത്.
മത്തായി 13:55 ലെ യേശുവിന്റെ സഹോദരന്മാര്‍ എന്ന പ്രയോഗം
ഈ വചനം വ്യക്തതയോടു കൂടി വായിക്കുമ്പോള്‍ മറിയത്തെ യേശുവിന്റെ അമ്മയെന്നും യാക്കോബിനെയും ജോസഫിനെയും ശിമയോനെയും യൂദാസിനെയും യേശുവിന്റെ സഹോദരങ്ങള്‍ എന്നും വ്യക്തമായി ഉപയോഗിക്കുന്നതില്‍ നിന്ന് യേശുവിന്റെ സഹോദരങ്ങള്‍ എന്ന ഗണത്തില്‍പ്പെട്ടവര്‍ ഒരിക്കലും മറിയത്തിന്റെ മക്കളല്ല എന്ന് വ്യക്തമാണ്. അങ്ങനെയെങ്കില്‍ എന്തുകൊണ്ടാണ് ‘സഹോദരങ്ങള്‍’ എന്ന വാക്ക് ഉപയോഗിച്ചിരിക്കുന്നത്? ഇവിടെ സഹോദരന്‍ എന്ന വാക്കിന് ‘ആദെല്‍ഫോസ്’ എന്ന ഗ്രീക്ക് പദമാണ് ഉപയോഗിച്ചിരിക്കുന്നത്. മലയാളഭാഷയില്‍ എന്നപോലെ തന്നെ ഗ്രീക്കിലെ ‘ആദെല്‍ഫോസ്’ എന്ന പദം രക്തബന്ധത്തിലുള്ള സഹോദരങ്ങളെ മാത്രമല്ല അര്‍ഥമാക്കുന്നത്്. അത് ചിലപ്പോള്‍ അടുത്ത ബന്ധുക്കളെയും ഒരേ ഗോത്രത്തിലുള്ളവരെയും ഒരേ നാട്ടിലുള്ളവരെയും അര്‍ഥമാക്കുന്നുണ്ട്.
ഉല്പത്തി 13:8 ല്‍ ലോത്തിനോട് അബ്രഹാം പറയുന്നുണ്ട് ‘നമ്മള്‍ സഹോദരന്മാരാണ്’ എന്നാല്‍ ലോത്ത് അബ്രാഹത്തിന്റെ യഥാര്‍ഥ സഹോദരനല്ലായിരുന്നു, മറിച്ച് അബ്രാഹത്തിന്റെ സഹോദരനായ ഹാരാന്റെ പുത്രനായിരുന്നു. ഒരേ ഗോത്രത്തിലുള്ളവരെ സഹോദരന്‍ എന്ന് വിളിക്കുന്നത് പഴയനിയമത്തില്‍ 2 സാമുവല്‍ 19:12-13 സംഖ്യ 8:26, 16:10 നിയമാവര്‍ത്തനം 18:2 എന്നിവിടങ്ങളില്‍ നമുക്ക് കാണാം. അതിനാല്‍ സഹോദരന്മാര്‍ എന്ന പ്രയോഗം കൊണ്ടു മാത്രം മത്തായി 13:55 സഹോദരങ്ങള്‍ രക്തബന്ധത്തിലുള്ള സഹോദരങ്ങളാകുന്നില്ല.
അതോടൊപ്പം മത്തായി 13:55 ല്‍ പറയുന്ന യാക്കോബിന്റെയും ജോസഫിന്റെയും യഥാര്‍ഥ അമ്മയുടെ പേര് മത്തായി സുവിശേഷകന്‍ തന്നെ 27:56 ല്‍ പറയുന്നുണ്ട്. ‘അക്കൂട്ടത്തില്‍ മഗ്ദലേന മറിയവും യാക്കോബിന്റെയും ജോസഫിന്റെയും അമ്മയായ മറിയവും സെബദി പുത്രന്മാരുടെ അമ്മയും ഉണ്ടായിരുന്നു.’ അതിനാല്‍ രക്തബന്ധത്തിലുള്ള സഹോദരങ്ങളല്ല മത്തായി 13:55 പറയുന്ന പേരുകള്‍, അതുകൊണ്ടാണ് സുവിശേഷങ്ങളില്‍ ഒരിടത്തും യേശുവിന്റെ സഹോദരന്മാരെ മറിയത്തിന്റെ മക്കളന്ന് വിളിക്കാത്തത്.
യോഹന്നാന്‍ 19:25 ല്‍ നാം വായിക്കുന്നു ‘യേശുവിന്റെ കുരിശിനരികെ അവന്റെ അമ്മയും അമ്മയുടെ സഹോദരിയും ക്ലോപ്പാസിന്റെ ഭാര്യ മറിയവും നില്‍ക്കുന്നുണ്ടായിരുന്നു. മത്തായി 13:55 ഉം മത്തായി 27:56 ഉം യോഹന്നാന്‍ 19:25 ഉം ചേര്‍ത്ത് വായിക്കുമ്പോള്‍ യേശുവിന്റെ സഹോദരന്മാര്‍ എന്ന് അറിയപ്പെടുന്നവര്‍ യേശുവിന്റെ അമ്മയായ മറിയത്തിന്റെ മക്കളല്ലെന്നും കുടുംബബന്ധത്തിലുള്ള സഹോദരങ്ങളാണെന്നും മനസിലാകും. യോഹന്നാന്‍ 19:26-27 വാക്യങ്ങളില്‍ യേശു തന്റെ അമ്മയെ ഏല്‍പ്പിക്കുന്നത് യോഹന്നാനെയാണ്. യേശുവിന്റെ സഹോദരങ്ങളെന്നു പരാമര്‍ശിക്കപ്പെട്ടവര്‍ മറിയത്തിന്റെ മക്കളായിരുന്നുവെങ്കില്‍ യോഹന്നാനെ ഏല്‍പ്പിക്കുന്നത് യുക്തിരഹിതമാണല്ലോ. ആയതിനാല്‍ സുവിശേഷങ്ങളില്‍ നാം കാണുന്ന ‘യേശുവിന്റെ സഹോദരങ്ങള്‍’ എന്ന പദപ്രയോഗം യേശുവിന്റെ അമ്മയായ മറിയത്തിന്റെ മക്കളാണെന്ന് യാതൊരുവിധ സൂചനയും നല്‍കുന്നില്ല. അതിനാല്‍, മത്തായി 1:25 ലെ ‘പുത്രനെ പ്രസവിക്കുന്നത് വരെ’ എന്ന പദവും മത്തായി 13:55 ലെ ‘സഹോദരന്മാര്‍’ എന്ന പ്രയോഗവും മാത്രം അടിസ്ഥാനമാക്കി യേശുവിന്റെ ജനനത്തിനുശേഷം മറിയത്തിന് മറ്റു മക്കളുണ്ടായിരുന്നുവെന്ന നിഗമനത്തിലെത്താനാവില്ല.
റവ. ഡോ. ജോജു കോക്കാട്ട്
