അറിവ് പരിവര്ത്തനമാണ് പരിശീലനമല്ല എന്ന് സീറോമലബാര് സഭ മേജര് ആര്ച്ചുബിഷപ്പ് മാര് റാഫേല് തട്ടില് പിതാവ്. ഏറ്റുമാനൂര് സൈം ഇന്റര്നാഷനല് സ്കൂളിന്റെ ഉദ്ഘാടനസമ്മേളനത്തിന് മുന്നോടിയായി വിശുദ്ധ കുര്ബാന അര്പ്പിച്ച് സന്ദേശം നല്കുകയായിരുന്നു തട്ടില് പിതാവ്.
അറിയുംതോറും നമ്മള് പരിവര്ത്തനപ്പെട്ടുകൊണ്ടിരിക്കുകയാണ്. ബാലനായ ഈശോയെക്കുറിച്ച് പറയുന്നതുപോലെ ജഞാനത്തിലും പ്രായത്തിലും വളരണം. പരിവര്ത്തനത്തിന്റെ രണ്ടു ഫലങ്ങളാണ് അത്. അവന് ദൈവത്തിന്റെ പ്രീതിക്ക് പാത്രമായി. സഹോദരങ്ങളുടെ നന്മയ്ക്ക് കാരണമായി. എല്ലാ പരിശീലനങ്ങളും എപ്രകാരമായിരിക്കണമെന്ന് നമ്മെ ഓര്മ്മപ്പെടുത്തുന്നതാണ് ഈ ബൈബിള് ഭാഗം.
നമ്മുടെ എല്ലാ പള്ളിക്കൂടങ്ങളും വേദപഠനങ്ങളും ഈ വലിയ പരിവര്ത്തനത്തിന് കുഞ്ഞുങ്ങളെ സഹായിക്കുന്നവയാണ്. ആ പരിവര്ത്തനം നമ്മള് നല്ലതുപോലെ നടത്തുന്നുവെന്ന് മറ്റുള്ളവര്ക്കും ഉറപ്പുണ്ട്.
നമ്മുടെ കുട്ടികള് ജഞാനത്തിലും പ്രായത്തിലും വളരണമെന്നും തട്ടില് പിതാവ് ഓര്മ്മിപ്പിച്ചു.
