ഉത്ഥാനത്തിരുന്നാളിലേക്ക് കൂടുതല് ഒരുക്കത്തോടെ പ്രവേശിക്കാന് തിരുസഭാമാതാവ് നമ്മെ ക്ഷണിക്കുന്ന ദു:ഖശനി, ഉത്ഥാനത്തിരുന്നാളിന്റെ കൊടിയേറ്റ ദിവസമാണെന്ന് സീറോമലബാര്സഭ മേജര്ആര്ച്ചുബിഷപ്പ് മാര് റാഫേല് തട്ടില്പിതാവ്. കാക്കനാട് മൗണ്ട്സെന്റ് തോമസില് ദു:ഖശനിയാഴ്ചയിലെ തിരുക്കര്മ്മങ്ങളില് കാര്മ്മികത്വം വഹിച്ച് സന്ദേശം നല്കുകയായിരുന്നു അദ്ദേഹം.
കര്ത്താവിന്റെ ഉത്ഥാനത്തിന്റെ സദ്വാര്ത്ത ഈ ലോകത്തെ അറിയിക്കാന് ദൈവം തിരഞ്ഞെടുത്തത് സ്ത്രീകളെയാണ്. മറിയം മഗ്ദലന, മറ്റേ മറിയം, ക്ലോപ്പസിന്റെ അമ്മ, പേരു പറയാത്ത മറ്റൊരു സ്ത്രീ. ശാബത്ത് ആയതുകൊണ്ട് യഹൂദാചാരപ്രകാരം ഉചിതമായതും മാന്യമായതുമായ സംസ്കാരം യേശുവിന് കൊടുക്കാന് പറ്റാതെ പോയതുകൊണ്ട്, കൊടുക്കേണ്ടത് കൊടുക്കേണ്ടതുപോലെ കൊടുക്കാന് കഴിയാതെ പോയപാവപ്പെട്ട സ്്ത്രീകളുടെ മനോവികാരമാണ് കല്ലറ തേടിപ്പോകാന് അവരെ പ്രേരിപ്പിച്ചത്.
ഉത്ഥാനത്തിരുന്നാളിലേക്ക് പ്രവേശിക്കുന്ന ഈ ദിവസം നമ്മെ നയിക്കേണ്ട ആദ്യത്തെ ചിന്ത അതാണ്. കൊടുക്കേണ്ടത് കൊടുക്കേണ്ടവിധത്തില് എനിക്ക് കൊടുക്കാന് കഴിഞ്ഞിട്ടുണ്ടോ?. അതുതേടിവരുന്നവരാണ് ഉത്ഥാനം കണ്ടെത്തുന്നത്. നമ്മള് കൊടുത്തിട്ടുണ്ട്. പക്ഷേ കൊടുക്കേണ്ടതുപോലെ കൊടുത്തിട്ടുണ്ടോ? കൊടുക്കാന് കഴിയാതെപോയതോര്ത്ത് മനസ്സ് ഭാരപ്പെട്ടിട്ടുണ്ടോ?
ഉത്ഥാനത്തിരുനാള് ആഘോഷിക്കാനുള്ള അവസരമാകണമെങ്കില് തേടിപ്പോകാന്,കൊടുക്കേണ്ടത് കൊടുക്കേണ്ടപോലെ കൊടുക്കാനുള്ള സന്മനസ്സുണ്ടാകണം ..അവര്ക്കാണ് ഉത്ഥാനത്തിരുനാളിന്റെ രഹസ്യം തുറക്കാനുള്ള താക്കോല് കിട്ടുന്നത്.
ദു:ഖശനി കഴിഞ്ഞതുകൊണ്ട് ഉത്ഥാനം സമാഗതമാകണമെന്നില്ല. ഉത്ഥാനത്തിന്റെ സന്തോഷം നോമ്പു വീടുന്ന സന്തോഷമല്ല. അതിനെക്കാള് കൂടുതല് ഉത്ഥിതന് എന്നെ സംബന്ധിച്ചിടത്തോളം എന്റെ ജീവിതത്തിന്റെ അടയാളമായി മാറുന്നതാണ്. നമുക്കിടയില് പ്രശ്നങ്ങളുണ്ട്, പ്രതിസന്ധികളുണ്ട്, കാര്മേഘങ്ങളുണ്ട്. പക്ഷേ കല്ലുരുട്ടി മാറ്റുന്നവന് നമ്മുടെയിടയിലുണ്ട്. കല്ല് ആരു ഉരുട്ടിമാറ്റുമെന്ന ചോദ്യവുമായി വന്ന സ്ത്രീകള് കണ്ടത് കല്ലു ഉരുട്ടിമാറ്റിയിരിക്കുന്നതാണ്. ആരുസഹായിക്കും എന്ന ചോദ്യത്തിന് കര്ത്താവ് നല്കിയ ഉത്തരം ഞാന് നിങ്ങളെ സഹായിക്കും എന്നാണ്.
ഉരുട്ടിമാറ്റപ്പെട്ട കല്ലുകള് തുറക്കപ്പെട്ട കല്ലുകളാണ്. കര്ത്താവിനെ തേടിവന്നവരില് കര്ത്താവ് പേരെടുത്തുവിളിക്കുന്നത് ഒരാളെ മാത്രമേയുള്ളൂ. മറിയം. ക്രിസ്തു ഈ ലോകത്തോട്പറഞ്ഞ സദ്വാര്ത്തയുടെ പൊരുള് മാനസാന്തരവും പാപമോചനവുമാണ്, നീ എത്രവലിയ പാപിയാണെങ്കിലും നിന്റെ ജീവിതത്തിന്റെ പഴയതാളുകള് കീറിക്കളഞ്ഞ് നിന്നെ പുതുക്കാന് വന്നവനാണ് ഞാന് എന്നാണ് യേശുപറയുന്നത്. ഉത്ഥാനത്തിന്റെ ഏറ്റവും വലിയ സന്തോഷവും ഇതുതന്നെയാണ്. പഴയതിനെ മാറ്റി പുതുതാക്കിത്തീര്ക്കുന്നു.
സമാധാനത്തിന്റെ കൃപയാണ് ഉത്ഥാനത്തിന്റെ സന്തോഷം ലോകത്തിന് നല്കുന്നത്. ഉത്ഥാനം നല്കുന്ന സമാധാനത്തിന്റെ സന്തോഷം നഷ്ടപ്പെടുത്താതെ വേണം നോമ്പ് വീടേണ്ടത്. സംഘര്ഷങ്ങളും വേദനകളും മരണങ്ങളും സങ്കടങ്ങളും എല്ലാം ഉത്ഥാനത്തിന്റെ കാഹളമായി മനസ്സിലാക്കാന് ഇന്ന് നമ്മെ ദൈവം വിളിക്കുന്നു.
ദു:ഖശനിയാഴ്ച എല്ലാം പുതുക്കപ്പെടുന്ന ദിവസമാണ്. തിരിയും വെള്ളവും എല്ലാം പുതുതായി വെഞ്ചിരിക്കുന്നു. കര്ത്താവ് ഉയിര്ത്തു എന്ന സദ്വാര്ത്തയാണ് ഒരുക്രൈസ്തവന് ലോകത്തിന് നല്കുന്ന ഏറ്റവും വലിയ സന്തോഷം. വീട്ടിലും സമുഹത്തിലും തൊഴിലിടങ്ങളിലുമെല്ലാം നല്ല ക്രൈസ്തവനായി ജീവിക്കാന് ഏറ്റെടുക്കേണ്ടിവരുന്ന ക്രൂശുമരണങ്ങളുണ്ട്. ആ കുരിശുമരണങ്ങളുടെ നടുവില് കര്ത്താവിന്റെ ഉത്ഥാനപ്പെരുന്നാളുണ്ട്.
ഉത്ഥാനപ്പെരുന്നാളിലേക്ക് പ്രവേശിക്കാന് കാത്തിരിക്കുന്ന ഈ ദിവസം നമുക്ക് നമ്മെതന്നെ പുതുക്കാം. പുതുവസ്ത്രങ്ങളണിയാം. പുതുമയുടെ വെളിച്ചം ഈ ലോകത്തിന് സമ്മാനിക്കണം. പൊതുവായ ആഘോഷമല്ല ഉത്ഥാനപ്പെരുന്നാള്. അത് മറിയത്തെ പേരുചൊല്ലിവിളിക്കുന്നതുപോലെ ഓരോരുത്തരെയും വ്യക്തിപരമായി പേരു ചൊല്ലി വിളിക്കുന്നതാണ്. തട്ടില് പിതാവ് പറഞ്ഞു.
