കുറവിലങ്ങാട്: ഏഴരപ്പള്ളികള്ക്ക് തുല്യം നില്ക്കാന് കഴിയുന്ന പൈതൃകപാരമ്പര്യമുള്ള ദേവാലയമാണ് കുറവിലങ്ങാട് പള്ളിയെന്ന് സീറോമലബാര്സഭ മേജര്ആര്ച്ചുബിഷപ്പ് മാര് റാഫേല്തട്ടില് പിതാവ്. മേജര്ആര്ച്ചുബിഷപ്പായി തിരഞ്ഞെടുക്കപ്പെട്ടതിന് ശേഷം ആദ്യമായി കുറവിലങ്ങാട് ദേവാലയത്തിലെത്തിയതായിരുന്നു മേജര്ആര്ച്ചുബിഷപ്പ്.
കാനായിലെ കല്യാണവീടിന്റെ തുടര്ച്ചയായാണ് കുറവിലങ്ങാട് പള്ളിയെ ഞാന് കാണുന്നത്്..യേശു ഉള്ള ഈ പള്ളി അമ്മവഴി യേശുവിന്റെ സാന്നിധ്യം നമുക്ക് കൂടുതല് നല്കുന്നു. എല്ലാ മരിയന് തീര്ഥാടനകേന്ദ്രങ്ങളും യേശുവിലേക്കുള്ള വഴിയാണ്. പക്ഷേ അത് വളരെ പ്രത്യേകമായി കുറവിലങ്ങാട് പള്ളി പ്രകടിപ്പിക്കുന്നു.
തറവാടു വീടായാണ് വിശ്വാസികള് ഈ ദേവാലയത്തെ കാണുന്നത്. മാര്ത്തോമ്മാക്രിസ്ത്യാനികളുടെ പൊതുപൈതൃകം കാത്തുസൂക്ഷിക്കുന്ന തറവാടാണ് ഇത്. അവധിക്കാലങ്ങളില് അമ്മവീട്ടില് പോകുന്നതുപോലെയാണ് ഞാനുള്പ്പടെയുള്ളവര് ഈ ദേവാലയത്തിലേക്ക് കടന്നുവരുന്നത്. സീറോ മലബാര്സഭയുടെ തനിമ എപ്പോഴൊക്കെ നഷ്ടപ്പെട്ടിട്ടുണ്ടോ അന്നൊക്കെ അത് നിലനിര്ത്താന് വേണ്ടി സഭ പൊരുതിയതിന്റെ ആയുധപ്പുരയായി നിന്നത് കുറവിലങ്ങാട് പള്ളിയായിരുന്നു.
സീറോ മലബാര്സഭയുടെ സ്വാതന്ത്ര്യത്തിന്റെ മൂലക്കല്ല് ഈ ദേവാലയമാണ്. രാമപുരം, മണര്കാട്,അതിരമ്പുഴ, ഇലഞ്ഞി തുടങ്ങിയപള്ളികളൊക്കെ കുറവിലങ്ങാട് പള്ളിയില് നിന്ന് പിരിഞ്ഞുപോയവയാണ്. ജാതിമതഭേദമന്യേ അനേകര് ഇവിടെ മുത്തിയമ്മയുടെ അനുഗ്രഹം തേടിയെത്തുന്നു. കുറവിലങ്ങാടിലെ മൂന്നുനോമ്പ് മലബാറിലെ ദേവാലയങ്ങളില് ആചരിക്കാറുണ്ട്.ഇതൊക്കെ കുറവിലങ്ങാട് പള്ളിയുടെ പ്രത്യേകതകളാണ്. രൂപതയുടെയോ ഇടവകയുടെയോ പള്ളിയായി മാത്രം കുറവിലങ്ങാട് ദേവാലയത്തെ ചുരുക്കരുത്. എക്യുമെനിക്കല് കാഴ്ചപ്പാടോടെ ഈ ദേവാലയത്തെ മാറ്റിയെടുക്കണം.
സീറോ മലബാര്സഭ എന്നും ക്രിസ്തുവിനെ സ്നേഹിച്ചിട്ടുള്ളത് ക്രിസ്തുവിന്റെ സഭയെ സ്നേഹിച്ചുകൊണ്ടാണ്. സഭയെ അനുസരിച്ചും കീഴ് വഴങ്ങിക്കൊണ്ടുമാണ്. സഭയെ സ്നേഹിക്കാന്, ക്രിസ്തുവിനെ സ്നേഹിക്കാന് നമുക്ക് ഒന്നിപ്പിന്റെ, അനുസരണത്തിന്റെ കഴിവുണ്ടാകട്ടെ.
അനുസരിക്കുന്നവര്ക്ക് മാത്രമേ സഭയെ സ്നേഹിക്കാനും ക്രിസ്തുവിനെ ഏറ്റുപറയാനും കഴിയൂ. അത്തരമൊരു അനുസരണത്തിലേക്ക് , സ്നേഹത്തിലേക്ക് വളരാന് കുറവിലങ്ങാട് നമ്മെ സഹായിക്കട്ടെ. കാരണം കുറവിലങ്ങാട് പളളിയുടെ പൈതൃകം എല്ലാവരെയും ഒന്നിപ്പിക്കുന്നതിന്റെയാണ്. മേജര്ആര്ച്ചുബിഷപ്പ് പറഞ്ഞു.
