വിശ്വാസപരിശീലന കമ്മീഷൻ അനുമോദന മീ​റ്റീം​ഗ് സംഘടിപ്പിച്ചു 

വിശ്വാസപരിശീലന കമ്മീഷൻ അനുമോദന മീ​റ്റീം​ഗ് സംഘടിപ്പിച്ചു 

കാക്കനാട്: സീറോമലബാർ വിശ്വാസപരിശീലന കമ്മീഷന്റെ നേതൃത്വത്തിൽ ആദരവ്-2022 എന്ന പേരിൽ കോവിഡ് പ്രതിസന്ധിയിൽ മതബോധന ക്ലാസ്സുകൾ ടെലവിഷൻ ചാനലുകൾ വഴി സംപ്രേഷണം ചെയ്യാൻ സഹായിച്ച ചാനൽ മേധാവികളെയും വിവിധ രൂപതാ മതബോധന ഡയറക്ടർമാരെയും ക്ലാസ്സുകളെടുത്ത അധ്യാപകരെയും മൗണ്ട് സെന്റ് തോമസിൽ ചേർന്ന മീറ്റിം​ഗിൽ ആദരിച്ചു. വിശ്വാസ പരിശീലനം ഏവരുടെയും കടമയാണെന്നും ശാലോം, ​ഗുഡ്നെസ്, ഷെക്കയ്ന എന്നീ ചാനലുകൾ ഈ ദൗത്യം കൃത്യമായി നിർവ്വഹിച്ചതിനുള്ള സഭയുടെ ആദരം നല്കുകയും ചെയ്തുകൊണ്ട് മേജർ ആർച്ചുബിഷപ് കർദിനാൾ മാർ ജോർജ് ആലഞ്ചേരി പിതാവ് മീറ്റീം​ഗ് ഉദ്ഘാടനം ചെയ്തു. മാറുന്ന കാലഘട്ടത്തിൽ മാധ്യമങ്ങളുടെ വലിയ സാധ്യതകളെ ഉപയോ​ഗപ്പെടുത്തേണ്ടതിന്റെ ആവശ്യകതയെയും ടെലവിഷൻ ചാനലുകളുടെ വർദ്ധിച്ച പ്രസക്തിയെയും അവരുടെ നിസ്വാർത്ഥമായ സഹകരണത്തെയും അഭിനന്ദിച്ചുകൊണ്ട് മീറ്റിം​ഗിൽ വിശ്വാസപരിശീലന കമ്മീഷൻ ചെയർമാർ ആർച്ചുബിഷപ് മാർ ജോർജ് ഞറളക്കാട്ട് പിതാവ് അധ്യക്ഷത വഹിച്ചു. 

കോവിഡ് പ്രതിസന്ധിഘട്ടത്തിൽ, 2021-22ലെ സീറോമലബാർ സഭയുടെ  വിശ്വാസ പരിശീലന ക്ലാസ്സുകൾ ഇം​ഗ്ലീഷിലും മലയാളത്തിലുമായി സംപ്രേഷണം ചെയ്ത ശാലോം ടെലവിഷൻ ജനറൽ മാനേജർ ശ്രീ. സിബി പുല്ലൻപ്ലാവിനെയും ടീം അം​ഗങ്ങളെയും ​ഗുഡ്നസ് ടെലവിഷൻ ജനറൽ മാനേജർ ശ്രീ. സിബി വല്ലൂരാനെയും ടീം അം​ഗങ്ങളെയും ഷെക്കെയ്നാ ടെലവിഷൻ എം.ഡി. ബ്രദർ സന്തോഷ് കരിമാത്രയെയും ടീം അം​ഗങ്ങളെയും  ആദരിച്ചു. ക്ലാസുകൾക്ക് നേതൃത്വം നല്കിയ ഇരുപത് രൂപതാ ഡയറക്ടർമാരെയും 160ഓളം അധ്യാപകരെയും ഈ മീറ്റിം​ഗിൽ ആദരിച്ചു.

മീറ്റിം​ഗിൽ വിശ്വാസപരിശീലന കമ്മീഷൻ സെക്രട്ടറി ഫാ. തോമസ് മേൽവെട്ടത്ത് ഏവരേയും സ്വാ​ഗതം ചെയ്തു സംസാരിച്ചു. രൂപതാ ഡയറക്ടേഴ്സിന്റെ പ്രതിനിധി ഫാ. ഡേവിസ് പാനാടൻ സി.എം.ഐ. യും അധ്യാപകരുടെ പ്രതിനിധി ശ്രീ. ഷാജി സി. മാണിയും സംസാരിച്ചു. സി. നമ്രതാ എം. എസ്. ജെ പ്രാരംഭ ​ഗാനവും സി. ലിസാ അലക്സ് എസ്. കെ. ഡി ​ഗാനവും ആലപിച്ചു. ഫാ. ഫ്രാൻസിസ് ആളൂർ ഏവർക്കും നന്ദി പറഞ്ഞു. ഇടുക്കി വിശ്വാസ പരിശീലകരുടെ നേതൃത്വത്തിൽ സീറോമലബാർ ആന്തം ആലപിച്ചതോടെ മൂന്നു മണിക്കൂർ നീണ്ട ആദരവ് 2022- അനുമോദന മീറ്റീം​ഗ് ഉച്ചക്ക് 1.30ന്  സമാപിച്ചു.