അംഗീകാരങ്ങളുടെ നിറവിൽ ജോബിയച്ചന്റെ  'സുകൃത സൂക്തങ്ങള്‍'

അംഗീകാരങ്ങളുടെ നിറവിൽ ജോബിയച്ചന്റെ  'സുകൃത സൂക്തങ്ങള്‍'

കണ്ണൂര്‍:  ചെറുപുഷ്പ സന്ന്യാസ സഭാംഗമായ ഫാ. ജോബി കൊച്ചുപുരയില്‍ ആദ്യാക്ഷരപ്രാസം ഉപയോഗിച്ച് രചിച്ച 'സുകൃത സൂക്തങ്ങള്‍' എന്ന ഗ്രന്ഥം നിരവധി പുരസ്കാരങ്ങൾ നേടി ശ്രദ്ധേയമാകുന്നു. മലയാളത്തിലെ മുഴുനീള ആദ്യാക്ഷര പ്രാസ ഗ്രന്ഥത്തിനുള്ള ദി ബെസ്റ്റ് ഓഫ് ഇന്ത്യ റിക്കാര്‍ഡ്, ഇന്ത്യ ബുക്ക് ഓഫ് റിക്കാര്‍ഡ്, ഏഷ്യ ബുക്ക് ഓഫ് റിക്കാര്‍ഡ് എന്നീ പുരസ്‌കാരങ്ങളാണ്   ജോബിയച്ചന്റെ കൃതി നേടിയത്. ഈ ഗ്രന്ഥത്തിന്റെ പേരില്‍ ഏഷ്യന്‍ ബുക്ക് ഓഫ് റിക്കാര്‍ഡ്സിൻ്റെ ഗ്രാന്‍ഡ് മാസ്റ്റര്‍ പദവിയും ഇദ്ദേഹത്തിന് ലഭിച്ചു. ഫാ. ജോബി കൊച്ചുപുരയിലിൻ്റെ  മലയാളഭാഷയിലെ  പ്രാവീണ്യവും  വ്യത്യസ്തമായ അവതരണ ശൈലിയും ആദ്യാക്ഷരപ്രാസം ഉപയോഗിക്കുന്നതിലെ നൈപുണ്യവും വ്യക്തമാക്കുന്നതാണ് ഈ ഗ്രന്ഥം.

വര്‍ഷത്തില്‍ 365 ദിവസത്തേക്കുള്ള വിശിഷ്ട ചിന്തകളാണ് സുകൃത സൂക്തങ്ങളിലൂടെ ഇദ്ദേഹം വായനക്കാരിലേക്ക് പകരുന്നത്. ഓരോ ചിന്തകളും ആറു വാചകങ്ങള്‍ ഉള്‍പ്പെടുത്തി ആദ്യാക്ഷര പ്രാസത്തിലാണ് ചിട്ടപ്പെടുത്തിയിട്ടുള്ളത്.

ചെറുപുഴ നവജ്യോതി കോളജിലെ മുന്‍ വൈസ് പ്രിന്‍സിപ്പലായിരുന്ന ഫാ. ജോബി പ്രസംഗങ്ങളിലും സന്ദേശങ്ങളിലും ആശംസാ കുറിപ്പുകളിലുമൊക്കെ ആദ്യാക്ഷരപ്രാസം പ്രയോഗിച്ച് നേരത്തേ ശ്രദ്ധേയനായിരുന്നു. മലയാളവും ഇംഗ്ലീഷും പ്രാസഭംഗിയോടെ ഉപയോഗിക്കുന്ന അച്ചന്റെ ക്ലാസുകളും  ശ്രദ്ധ പിടിച്ചുപറ്റിയിരുന്നു.

തിരുച്ചിറപ്പള്ളി സെന്റ് ജോസഫ്‌സ് കോളജില്‍നിന്ന് ഇംഗ്ലീഷ് സാഹിത്യത്തില്‍ റാങ്കോടുകൂടി ബിരുദാനന്തരബിരുദവും പോണ്ടിച്ചേരി കേന്ദ്ര സര്‍വകലാശാലയില്‍നിന്ന് എം ബി എയും എം എസ് യൂണിവേഴ്‌സിറ്റിയില്‍നിന്ന് മനഃശാസ്ത്രത്തില്‍ ബിരുദാനന്തരബിരുദവും 2020ലെ ബെസ്റ്റ് പിഎച്ച്ഡി റിസര്‍ച്ച് സ്‌കോളര്‍ അവാര്‍ഡും നേടിയ ഫാ. ജോബി ഇപ്പോള്‍ ഭാരതിദാസന്‍ യൂണിവേഴ്‌സിറ്റിയില്‍ ഇംഗ്ലീഷ് സാഹിത്യത്തില്‍ ഗവേഷകനാണ്. തളിപ്പറമ്പ് ബാലേശുഗിരിയിലെ കൊച്ചുപുരയില്‍ ജോസഫ് ഗ്രേസി ദമ്പതികളുടെ മകനാണ്