ഛാന്ദായുടെ 'പൗലോസ് അപ്പസ്തോലന്‍' ഇനി ജ്വലിക്കുന്ന ഓര്‍മ്മ
admin 
ഛാന്ദാ: ഛാന്ദാ രൂപതയിലെ മിഷനറി വൈദികനായിരുന്ന ഫാ. ജോര്‍ജ് കനീഷ്യസ് കച്ചിറമറ്റം (സി എം ഐ) ഓര്‍മ്മയായി. 1936ല്‍ പാലാ രൂപതയിലെ രാമപുരം ഇടവകയില്‍ ആണ് ഫാ. കനീഷ്യസ് ജനിച്ചത്. 1964 ല്‍ തിരുപ്പട്ടം സ്വീകരിച്ച അച്ചന്‍ 1966 മുതല്‍ ഛാന്ദാ രൂപതയിലെ മിഷന്‍ പ്രവര്‍ത്തന രംഗത്ത് സജീവസാന്നിധ്യം ആയിരുന്നു. വറൂര്‍, പാട്ടഗുഡ, ശേങ്കാവ്, വണി, ജീവതി എന്നീ മിഷന്‍ സെന്‍ററുകള്‍ രൂപീകരിക്കുന്നതില്‍ അദ്ദേഹം മുഖ്യപങ്കുവഹിച്ചു. കൂടാതെ വീരുര്‍, കൊപ്രേലി, അള്ളാപ്പള്ളി, ഗോമിനി എന്നീ മിഷന്‍ മേഖലകളിലും പ്രവര്‍ത്തിച്ചിട്ടുണ്ട്. ഇവിടങ്ങളിലെല്ലാം തന്നെ ദാരിദ്ര്യനിര്‍മാര്‍ജനത്തിന് അദ്ദേഹം നിരവധി പദ്ധതികള്‍ ആവിഷ്കരിച്ചു. അന്നാട്ടിലെ ആദിവാസികളുടെയും പാവങ്ങളുടെയും രോഗികളുടെയും ഒറ്റപ്പെട്ടു കഴിയുന്നവരുടെയും വയോധികരുടെയും ഉറ്റതോഴനും നിത്യസന്ദര്‍ശകനുമായിരുന്ന അദ്ദേഹത്തെ 'കാല്‍നട സഞ്ചാരിയായ മിഷനറി' എന്നും വിളിച്ചിരുന്നു. മിഷന്‍ പ്രദേശങ്ങളിലെ ജനങ്ങളുടെ വിദ്യാഭ്യാസത്തിനും പുരോഗതിക്കും വലിയ പ്രാധാന്യം നല്‍കിയ വ്യക്തിയായിരുന്നു ഫാ. ജോര്‍ജ് കനീഷ്യസ്.
ഛാന്ദാ രൂപതയുടെ ബെസ്റ്റ് മിഷനറി അവാര്‍ഡ്, സീറോമലബാര്‍ സഭയുടെ റിസര്‍ച്ച് സെന്‍റര്‍ പുരസ്കാരം എന്നിങ്ങനെ നിരവധി അവാര്‍ഡുകള്‍ക്ക് അദ്ദേഹം അര്‍ഹനായി. സംസ്കാര ശുശ്രൂഷകള്‍ രാമപുരത്തുള്ള അമനകര സിഎംഐ ഭവനില്‍ മാര്‍ ജോസഫ് കല്ലറങ്ങാട്ടിന്‍റെ മുഖ്യകാര്‍മികത്വത്തിലും മാര്‍ ജോസഫ് കുന്നത്തിന്‍റെ സഹകാര്‍മികത്വത്തിലും നടന്നു.
